Şeiri səsləndirmək, ən az onu yazmaq qədər çətin işdir. Bu məsuliyyətli və önəmli vəzifə isə bədii qiraət ustalarının üzərinə düşür. Bədii qiraət ustası ən azı şairin özü qədər o şeiri duymalı, o misraları hiss etməli, şairin hisslərinə və fikrinə sadiq qalmaq şərtilə öz hisslərini də tamaşaçıya çatdırmağı bacarmalıdır. Təkcə gözəl səs, aydın tələffüz, səlis diksiya şeiri səsləndirmək üçün şərt deyil. Bunlarla yanaşı sözü hiss edən, şeiri duyan ürək də lazımdır. Hansı ki, o ürəkdə ən azı şairin özü qədər o misraların alovuna yanıb, oxucunu öz atəşində qızdıra bilsin. 

Azərbaycanda bədii qiraət sənətinin Müxlis Cənizadə, Həsən Əbluç, Mikayıl Mirzə, Ağalar Bayramov, Ənvər Vəliyev və başqa ustaları ilə yanaşı bu missiyanı öz zərif çiyinlərində daşıyaraq, səsinin sehri, içdən gələn ifadəli təqdimatı ilə dinləyicini şeyriyyat aləminə varmağa, yaşamaq və yaşatmağa sövq edən bir aktrisa da var – Xalq artisti Əminə Yusifqızı.

Sentyabrın 24-də Bakıda dünyaya gələn Əminə xanım hələ məktəb yaşlarından Gənc Tamaşaçılar Teatrında bir çox maraqlı çıxışları ilə yadda qalıb. 1961-ci ildə M.F.Axundov adına Pedaqoji Rus Dili və Ədəbiyyatı İnstitutunu (indiki Bakı Slavyan Universiteti) bitirən Əminə xanım 1958-1964-cü illərdə Azərbaycan Dövlət Gənc Tamaşaçılar Teatrının, 1964-1974-cü illərdə isə Alademik Milli Dram Teatrının aktrisası olub. 1974-cü ildən "Azərbaycan film" kinostudiyasının nəzdində fəaliyyət göstərən kino aktyor teatr studiyasında çalışır. Dublyaj, səsləndirmə sahəsində də fəaliyyətləri mövcuddur.

O, radio və televiziya çəkilişlərində müxtəlif planlı rolların əvəzolunmaz ifaçısıdır. Əminə Yusifqızının səhnədə ilk rolu – Yusif Əzimzadənin "Anacan" əsərində Qulu obrazı olub. Ardıcıl olaraq o, Cəfər Cabbarlının "Yaşar" əsərində Yaqut, R.İsmayılovun "Sonuncu məktub"unda Sabirə, İ.Coşqunun "Komsomol həqiqəti" əsərində Humay, Bernard Şounun "Şeytanın şagirdi" əsərində Esse, Çingiz Aytmatovun "Ana tarla"sında Aliman, Q.Rəsulovun "Söz yarası"nda Ülkər və başqa bu kimi Azərbaycan teatr və kino sənətinin incisi hesab olunan obrazlara həyat verib, "Şərikli çörək", "Sən nə üçün susursan?", "Bizim küçənin uşaqları", "Musiqi müəllimi" və s. filmlərdə, televiziya tamaşalarında çəkilib.

Qırx ildən çoxdur ki, azərbaycanlı tamaşaçı Əminə xanımın bənzərsiz səsinin sehri ilə gah keçmişini xatırlayıb üzülür, gah sabahına ümid edir, gah gülür, gah ağlayır, amma həmişə şeirin, sözün, məlahətli səsin təravətindən zövq alır. Əminə xanım bir şeirdə müxtəlif obraza düşə bilən, müxtəlif səs tembrlərindən məharətlə istifadə edən sənətkardır. O, şeiri bənd-bənd, fikir-fikir, misra-misra deyil, söz-söz yaşayır, hiss edir və dinləyicisinə hiss etdirir. Sevgilisindən ayrı düşən aşiqin həsrət yanğısı, xəyanətə düçar olan qəhrəmanın qəzəbi, ədalətsizliklə üzləşən insanın mətanəti, sevdiyini görən, ona qovuşan divanənin sevinci bu səsin bütün çalarlarında öz əksini tapır. 

“Şöhrət” ordenli Xalq artisti, sevilən sənətkarımız Əminə Yusifqızını təbrik edir, ona möhkəm cansağlığı, uzun ömür və yeni-yeni yaradıcılıq uğurları arzulayırıq.