XIX əsr görkəmli fransız yazıçı-dramaturqu Onore de Balzak 20 may 1799-cu ildə Fransada anadan olub. O, Qərbi Avropa realizminin zirvəsi hesab edilir. Onun ən məşhur əsəri — "Bəşəri komediya" və ya "İnsan komediyası" (La Comédie humaine) adlı epopeyada fransız həyatının bütün sahələri 143 kitabda əks etdirilməli idi. O, bütün gücünü sərf edərək 90 roman və novella yazıb. Bu epopeyaya "Şaqren dərisi", "Yevgeniya Qrande", "Qorio ata", "Sezar Biroto", "İtirilmiş illüziyalar", “Vadidəki zanbaq” və digər romanlar daxildir.

Yazdığı yüzdən artıq roman və pyesləri birlikdə "İnsan komediyası" (La Comédie humaine) adı altında tanınır. Bu əsərlər toplusu və ya seriyası 1815-ci ildə Napoleon Bonapart Fransasının süqutundan sonrakı dövr fransız cəmiyyətinin, xüsusilə də burjua təbəqəsinin komik-satirik mənzərəsini canlandırır.

Digər fransız yazıçısı Qustav Flober ilə birgə Avropa ədəbiyyatında realizm məktəbinin əsasını qoyub. Balzakın pyesləri bir qayda olaraq oxucuda gülüş doğurmaqla yanaşı, aydın ifadə olunmuş rəngarəng obrazlar və pərdələrdəki hər bir səhnənin nəfis təsviri tamaşaçıda xüsusi maraq oyadır.

Adı tarixdə 100 ən çox öyrənilmiş şəxsiyyətlər siyahısına daxil edilib. Balzakın əsərləri bəşəriyyətin bədii inkişafında irəliyə doğru nəhəng bir addımdır.

Onore de Balzakın yaratdığı əsərlər çox rəngarəng və çox maraqlı olduğu kimi, onun sevgisi və evlənməsi də diqqət çəkmişdir. Belə ki, Onore de Balzak, sən demə, Rusiyada yaşayan polyak əsilli bir zadəgan qadın E. Qanskaya ilə yazışır, məktublaşırmış. Maraqlı olan odur ki, bu yazışma nə az, nə çox, düz 18 il davam edir.

Uzun yazışma və görüşlərdən sonra nəhayət 1850-ci ildə Balzak və Evelina evlənmək qərarına gəlirlər. Toy 1850-ci il 14 mart səhər saat 7-də Müqəddəs Varvarada baş tutur. Lakin bu evlilik çox uzun sürmür. Evləndikdən cəmi 5 ay sonra yazıçı 1850-ci il avqust ayının 18-də dünyasını dəyişib. 

Onore de Balzakın müdrik kəlamlarını sizə təqdim edirik: 

Arxitektura, xasiyyətlərin ifadəsidir.

Duyğuların zərifliyi ilə manera zərifliyi həmişə üst-üstə düşmür.

Ağrı, bəlkə də, həddindən artıq zövqdən başqa bir şey deyil.

Kişilərin əksəriyyəti skripka çalmağa cəhd edən oranqutanları xatırladır.

Ola bilsin ki, fəzilət mənəvi zəriflikdən başqa bir şey deyil.

Bürokratiya, piqmeylər tərəfindən hərəkətə gətirilən nəhəng mexanizmdir.

Güclü xarakterlə, təmiz əxlaqla və xeyirxahlıqla müşayiət olunan sərtliyə qarşı nifrət olmur.

Vaxt, zehni əmək işçisinin kapitalıdır.

İnsanın bütün bacarığı səbir və vaxtın vəhdətindən başqa bir şey deyildir.

Dəlilik etsən belə, etdiyin şeyi yaxşı etmək lazımdır.

Yazıçı ustalığının ən yüksək səviyyəsi fikri obrazda ifadə etməkdir.

Axmaqlıq iki cür olur: susqun və boşboğaz.

Kədər, bütün hisslərimizin ən dəyanətlisidir.

Ağlın işığı ilə işıqlandırılmayan fəzilət zərər verə bilər.

Əgər hər zaman tək danışacaqsansa, hər zaman da haqlı olacaqsan.

Əgər arvad qənaətdən danışarsa, deməli, sizin səhmləriniz qiymətdən düşməyə başlayıb.

Əgər özünüzə inanmırsınızsa, dahi ola bilməzsiniz.

Şairlər iki cür olur: hiss edənlər, bir də ifadə edənlər. Birincilər daha çox xoşbəxtdirlər.

Qadın instinkti böyük insanların uzaqgörənliyinə dəyər.

Ərinə gülən qadın, artıq onu sevmir.

İncəsənət, millətin libasıdır.

Həqiqi alim xəyalpərəstdir. Həqiqi olmayan alim isə özünü praktik adlandırır.

Bütün elmlərin açarı sual işarəsidir.

Danışmağa söz olmayanda çox danışırlar.

Hər yerdə olan kəsin şəxsiyyətinə heç yerdə maraq göstərilmir.

Bütün qadınları sevən qadınların heç birini qısqanmır.

Kim çox sübut edirsə, heç nə sübut etmir.

Qadını idarə etməyi bacaran dövləti də idarə edə bilər.

İkiüzlülük, xidmət etməyə öyrəşmiş insanlara hörmət hissi aşılayır.

Lovğa təbiət üçün sevgi, Yer üçün Günəş kimidir.

Qəddarlıq və qorxu bir-birinin əlini sıxan hisslərdir.

Hər zaman evdə olmaq imtiyazı yalnız padşahlara, qızlara və oğrulara aiddir.

Zəifliyini qəbul edən insan güclənir.

Bərabərlik hüquq ola bilər, amma heç bir güc onu fakta çevirə bilməz.

Ana ürəyi - dərinliyində həmişə bağışlanma tapılacaq bir uçurumdur.

Ciddilik, xarakterin əsasıdır.

Güclü həyat sarsıntıları kiçik qorxulara şəfa verir.

Kədər sonsuz, sevinc isə məhduddur.

Şübhələnmək, gücün itirilməsi deməkdir.

Məqsədə çatmaq üçün əvvəlcə getmək lazımdır.

Qozbellərin olduğu yerdə gözəl bədən quruluşu eybəcər görünür.

Şöhrət sərfəli mal deyildir: qiyməti baha, saxlanılması isə pis.

Kolleksiya toplamaq həvəsi zehni pozuntunun ilk mərhələsidir.