Züleyxa İsmayıl qızı Hüseynova 1924-cü il may ayının 29-da Bakıda anadan olub. 1942-ci ildə Azərbaycan Sənaye İnstitutunun neft-mexanika fakültəsinə qəbul olunub, ali təhsilini başa vurduqdan sonra İ.Q.Yesman adına Azərbaycan Elmi-Tədqiqat Energetika İnstitutunun aspiranturasında oxuyub.

1953-cü ildə namizədlik dissertasiyası müdafiə edib, sonrakı 6 il ərzində Azərbaycan SSR Elmlər Akademiyasında fəaliyyət göstərib. Daha sonra Azərbaycan Kommunist Partiyası Mərkəzi Komitəsinin elm və tədris müəssisələri şöbəsinin müdir müavini təyin edilib, 1963-cü ildə isə komitənin sədri vəzifəsinə təyin edilib.

1965-ci ilin iyulunda Komitə Azərbaycan SSR Ali və Orta İxtisas Təhsili Nazirliyinə çevrilib, Züleyxa Hüseynova nazir təyin edilib. Onun nazir kimi fəaliyyəti dövründə respublikada ali təhsil şəbəkəsinin genişləndirilməsi, məktəblərin maddi texniki bazasının möhkəmləndirilməsi istiqamətində sanballı işlər görülüb.

1965-1970-ci illərdə Ali və orta ixtisas təhsili naziri vəzifəsində uğurla çalışan Züleyxa Hüseynova 1970-ci ildə Azərbaycan KP MK-nın birinci katibi Heydər Əliyevin təşəbbüsü ilə Azərbaycan Həmkarlar İttifaqı Şurasının sədri vəzifəsinə seçilib. 1981-ci ildən Azərbaycan SSR Nazirlər Sovetində Elm, texnika və təhsil müəssisələri şöbəsinin müdiri olub. Təqaüdə çıxandan sonra Azərbaycan Texniki Universitetində daxiliyanma mühərrikləri kafedrasında məsləhətçi-professor işləyib.

Bir çox elmi məqalə və metodik işləri nəşr olunub. “Avtomobillər və traktorlar” adlı orijinal ali məktəb dərsliyinin həmmüəlliflərindəndir. SSRİ Ali Sovetinə (VII-X çağırış) deputat seçilib, Ali Sovetin daimi komissiyasının sədr müavini və sədri, Asiya və Afrika Ölkələri ilə Həmrəylik Komitəsi sədrinin müavini olub. Züleyxa Hüseynovanın Azərbaycanda maarif və təhsilin inkişafı sahəsindəki xidmətləri dövlət tərəfindən yüksək qiymətləndirilib,“Oktyabr inqilabı”, “Qırmızı Əmək Bayrağı” ordenləri, bir sıra medal və fəxri fərmanlarla təltif edilib. Züleyxa Hüseynova 1996-cı il mayın 24-də vəfat edib.