Bu il Azərbaycan ədəbiyyatının görkəmli nümayəndəsi, Xalq yazıçısı, dövlət mükafatı laureatı Maqsud İbrahimbəyovun anadan olmasının 90 ili tamam olub. Azərbaycan Respublikasının Prezidenti İlham Əliyevin Xalq yazıçısı Maqsud İbrahimbəyovun 90 illik yubileyinin keçirilməsinə dair imzaladığı Sərəncamdan irəli gələn tədbirləri həyata keçirmək məqsədilə Cəfər Cabbarlı adına Respublika Gənclər Kitabxanasında yazıçının yaradıcılıq nümunələrindən ibarət virtual kitab sərgisi hazırlanıb.

Kitabxanadan AZƏRTAC-a bildirilib ki, virtual sərgidə bir sıra rəsmi sənədlərin tam mətni, Ulu Öndər Heydər Əliyevin, Prezident İlham Əliyevin və Birinci vitse-prezident Mehriban xanım Əliyevanın yazıçı haqqında söylədikləri dəyərli fikirlər yer alıb.

İstifadəçilər müəllifin müxtəlif illərdə qələmə aldığı, Azərbaycan, ingilis, rus dillərində nəşr edilən və yazıçıya geniş oxucu auditoriyası qazandıran “Qoy o bizimlə qalsın”, “Qarapaltarlı qadın”, “Uşaqlığın son gecəsi”, “Müdrik Sfinks gülümsəyir”, “Ondan yaxşı qardaş yox idi” kimi 20-yə yaxın kitabın tam mətnindən yararlana bilərlər.

Kitabxana əməkdaşları tərəfindən hazırlanan virtual sərgidə Maqsud İbrahimbəyovun həyat və yaradıcılığı, geniş ictimai fəaliyyəti haqqında qələmə alınan “Ədəbiyyatımızın zadəgan nasiri”, “Maqsud İbrahimbəyov: yazıçı, sənətkar, düşüncə adamı”, “İbrahimbəyov fraqmentləri” kimi 10-dan çox məqalənin tam mətni də sərgilənib.

Virtual kitab sərgisi kitabxananın rəsmi saytında yerləşdirilib.