Azərbaycan ədəbiyyatının görkəmli nümayəndəsi, ictimai xadim, şair, dramaturq Rəsul Rzanın “Vəfa” pyesi əsasında Bakı Bələdiyyə Teatrının səhnələşdirdiyi eyniadlı tamaşasının premyerası olub.

Teatrdan AZƏRTAC-a bildirilib ki, əvvəlcə Dövlət Himni səsləndirilib və ölkəmizin ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.

Azərbaycan Dövlət Akademik Milli Dram Teatrının səhnəsində keçirilən premyerada rəsmi şəxslər, tanınmış elm və mədəniyyət xadimləri və media nümayəndələri iştirak ediblər.

Tədbirdə çıxış edən Milli Məclis sədrinin müavini, akademik Rafael Hüseynov görkəmli şairin zəngin yaradıcılığı, ibrətamiz həyat yolu barədə fikirlərini bölüşüb. Qeyd edib ki, böyük şairimiz, unudulmaz Rəsul Rzanın 115 yaşı münasibətilə illər sonra yenidən təqdim olunan, Bakı Bələdiyyə Teatrının səhnələşdirdiyi “Vəfa” tamaşasının nümayişinin bu günə təsadüf etməsi heç də təsadüfi deyil.

“28 May - Müstəqillik Günü ərəfəsində hazırlanan tamaşa əslində Rəsul Rza yaradıcılığının bütövlükdə Azərbaycanımızı azad görməsi və daima yaradıcılığında bunu xüsusilə qeyd etməsi şairin böyük arzusu, istəyi idi. Bu gün bu premyera bayram əhval-ruhiyyəsi yaradır. Unudulmaz şairin İkinci Dünya müharibəsi illərində yazdığı pyesin onun yubileyində Müstəqillik Günündə tamaşaçılara təqdim olunması Rəsul Rzanın ruhunu şad edir və bayram ovqatını daha da artırır”, - deyə akademik diqqətə çatdırıb.

Rafael Hüseynov daha sonra Bakı Bələdiyyə Teatrının baş rejissoru, “Vəfa” tamaşasını səhnələşdirən Xalq artisti Mərahim Fərzəlibəyova Rəsul Rza Mükafatını təqdim edib.

Rəsul Rzanın “Vəfa” pyesi inam, dostluq, sədaqət, dönüklük, ara qarışdırmaq kimi müsbət və mənfi keyfiyyətləri özündə əks etdirir. Pyesdə İkinci cahan savaşında göstərilmiş şücaət ümumxalq hünəri kimi təqdim edilir. Vətəni sevmək, xalqına bağlı olmaq pyes boyu müəllif tərəfindən vurğulanır. Tamaşanın quruluşçu rejissoru, Xalq artisti Mərahim Fərzəlibəyovdur. Rejissor səhnə əsərində müəllifin şeirlərindən, Krım cəbhəsində yazdığı məktublardan istifadə edib.

Tamaşanın quruluşçu rəssamı Əməkdar mədəniyyət işçisi İlham Əsgərov, musiqi hissə müdiri Əməkdar mədəniyyət işçisi Nazim Əbidov, işıqçı rəssamı Tərlan Ələsgərlidir.

Səhnə əsərində rolları teatrın aktyorları canlandırıblar.