İstər ifa etdiyi muğam, təsnif və mahnılar, istərsə də özünün bəstələdiyi əsərlərlə milyonların sevimlisinə çevrilən Xalq artisti Məmmədbağır Bağırzadənin Azərbaycan musiqi sənətində özünəməxsus yeri var. Hansı janrda ifa etməyindən asılı olmayaraq onun özünəməxsus ifa üslubu və ürəyəyatan səsi həmişə tamaşaçı zövqünü oxşayıb. Cəmi 55 il ömür sürməyinə baxmayaraq parlaq istedadı və bənzərsiz ifa tərzi ilə seçilən istedadlı sənətkarın yazdığı və oxuduğu musiqilər zamana sığmır.

AZƏRTAC xəbərverirki, Beynəlxalq Muğam Mərkəzində Xalq artsti Məmmədbağır Bağırzadənin 75 illiyinə həsrolunmuş xatirə gecəsində bu barədə danışılıb.

Xatirə gecəsi monitorda mərhum xanəndənin görüntülərinin verilməsi və ifasında musiqi nömrəsinin səsləndirilməsi ilə başlanılıb. Gecədə Əməkdar incəsənət xadimi Hacı Aqil Məlikov, Xalq artistləri Ağaverdi Paşayev, Mirnazim Əsədullayev, Əməkdar artist Sahib Paşazadə, müğənninin dünyaya göz açdığı Bakının Nardaran kəndinin ağsaqqallarından Hacı Hacıağa, “Dədə Qorqud” milli fondunun rəhbəri Eldar İsmayılov istedadlı muğam və mahnı ifaçısının sənətkarlıq xüsusiyyətləri və ona şöhrət gətirən yaradıcılıq üslubu barədə bəhs ediblər.

Məmmədbağır Bağırzadə ilə bir sinifdə oxuyan Qurban Xəlilov ustad ifaçı ilə bağlı xatirələrini danışıb, şair Yusif Nəğməkar, xanəndənin pərəstişkarı Elşən Məmmədov və başqaları çıxış edərək ona həsr etdikləri şeiri oxuyublar. Gecədə belə fikir ifadə olunub ki, səsi ana laylası kimi şirin, bulaq kimi həzin, bəstələdiyi yaz nəfəsli, bahar ətirli musiqilərlə milyonların ürəyinə yol tapan Məmmədbağır Bağırzadənin ifa etdiyi mahnı və təsniflər neçə-neçə illər sonra da səslənəcək və daim öz dinləyicilərinin könlünü oxşayacaq. Qeyd olunub ki, kəpənək qanadları kimi al-əlvan, göy qurşağı kimi rəngarəng olan bu füsunkar səs uzun illər boyu dinlənilərək sənətsevərləri öz sehrinə salmaqda davam edəcək.

Gecədə Xalq artisti Zabit Nəbizadə, gənc xanəndələr Məmməd Nəcəfov, Hüseyn Məlikov, Vəfa Vəzirova, müğənnilər Ayşən Mehdiyeva, Tural Salmanov və başqaları bəstəkar-müğənnin yaradıcılığından numunələr ifa ediblər.

Xatirə gecəsinin yekununda mərhum sənətkarın oğlu Rahim Bağırzadə atasının sənətinə verilən yüksək dəyərə görə minnətdarlığını bildirib və Asəf Zeynallı adına Musiqi Kollecinin builki məzunu, bəstəkar-müğənninin nəvəsi Məmmədbağır Bağırzadənin müşayiəti ilə musiqi nömrəsi səsləndirib.