229 il əvvəl 30 sentyabr 1791-ci il tarixində Vyananın “Auf der Viden” teatrında Avstriya bəstəkarı V.Motsartın (1756-1791) sonuncu əsəri – “Sehrli fleyta” operasının premyerası keçirilib. Operanın libretto müəllifi bəstəkarın köhnə dostu və antreprener Emmanuel Şikaneder yazıb.

Opera tamaşaçıların böyük rəğbətini qazanıb. Höte əsəri o qədər bəyənib ki, hətta librettonun davamını yazmağa cəhd edib, lakin bu iş uğursuzluğa düçar olub.

O dövrdə xalq arasında məşhur olan sehrlərlə dolu ənənələr ruhunda işlənən süjeti Şikaneder K.Vilandın “Lulu” nağılından ilhamlanaraq yazıb: Zarastro adlı sehrbaz Şahanənin qızını gecə vaxtı oğurlayır. Şahanə şahzadə Taminonu qızı xilas etməyə göndərir və ona sehrli fleyta ilə bir neçə köməkçi verir. Şahzadə sehrbazın tərəfinə keçir, sınaqlardan üzüağ çığır və Məhəbbəti qazanır. 

“Sehrli fleyta” – Motsartın sonuncu operasıdır və dahi bəstəkar onu ailənin sonbeşiyinə bəslənən xüsusi sevgi ilə yanaşıb. Əfsanəyə görə, ölüm yatağında olan bəstəkar məhz onu dinləməyi arzulayıb və Papagenonun nəğməsini zümzümə edib.

Azərbaycanda “Sehrli fleyta” ilk dəfə 2011-ci ilin 24 sentyabrında Heydər Əliyev Fondunun dəstəyi ilə Azərbaycan Dövlət Akademik Opera və Balet Teatrında tamaşaya qoyulub.

Əsərin bütün not materialları - partitura, klavir və orkestr səsləri Azərbaycan Dövlət Akademik Opera və Balet Teatrına Münhen Opera Sənəti Festivalının rəhbərliyi tərəfindən təqdim edilib. Tamaşada teatrın ən istedadlı vokalçıları - Əməkdar artistlər Əli Əsgərov (Zarasto), Gülnaz İsmayılova (Gecələr şahzadəsi), İnarə Babayeva (Pamina), gənc solistlər Fərid Əliyev (Tamino), İlham Nəzərov (Papageno), Fəridə Məmmədova, Səbinə Vahabzadə, Səbinə Əsədova (pərilər) və başqaları iştirak ediblər. Tamaşanın premyerası dövlət müstəqilliyimizin bərpasının iyirminci ildönümünə həsr olunmuş Üzeyir Hacıbəyli adına III Beynəlxalq Musiqi Festivalı çərçivəsində baş tutub.