Çexiyanın paytaxtında Marqarita Kərimova-Sokolovanın “İncəsənət səyyahları” adlı sərgisi keçirilib.

AZƏRTAC xəbər verir ki, sərgi Azərbaycanın Müstəqillik Gününə və görkəmli Azərbaycan bəstəkarı Üzeyir Hacıbəylinin anadan olmasının 140 illiyinə həsr edilib.

Təntənəli açılış mərasimi Azərbaycanın Dövlət himninin alt ifasında solo çıxışla başlayıb. Bu əsər əvvəllər təqdim olunmayan unikal formatda səsləndirilib. Pardubetsk Kamera Orkestrinin alt ifaçısı Elnarə Tağızadə Üzeyir Hacıbəylinin digər əsərlərini də təqdim edib. Bu musiqilər şərq musiqi ənənəsi ilə qərb klassik formasının sintezi kimi dünyaya tanınıb.

Açılış nitqində Azərbaycan Mədəniyyət Evinin rəhbəri Leyla Bəyim müəllifi olduğu bu layihənin konsepsiyasından danışıb və Hacıbəyli qardaşlarının Azərbaycan Xalq Cümhuriyyətinin formalaşmasındakı rolunu qeyd edib.

“O azadlıqsevər, müstəqil “incəsənət səyyahları” bir dildə danışırlar və bu dil sərhəd tanımır”, – deyə o bildirib.

Bu dil Azərbaycan rəssamının hər bir əsərində səslənib, Şərqlə Qərbi, keçmişlə bu günü birləşdirib.

Beynəlxalq mükafatlar laureatı M.Kərimova-Sokolovanın illüstrativ ekspozisiyası azadlıqsevər şairlərin, yazıçıların, musiqiçilərin və mütəfəkkirlərin ruhunun canlı təcəssümünə çevrilib. Onların sənət yolundakı sözü əsrləri adlayaraq bu günə gəlib çatıb.

Üzeyir Hacıbəyli, Xurşidbanu Natəvan, Karel Hinek Maxa, Nazim Hikmət, Maqsud İbrahimbəyov, Əminə Dilbazi, Cövdət Hacıyev, Qoya və Velaskes, baron Münhauzen — rəssamın əsərlərindəki bu qəhrəmanların hər biri qonaqları bədii və fəlsəfi bir səyahətə dəvət edib.

Ekspozisiyada “Səyyahlar” adlı qrafik silsilə xüsusi yer tutub. Bu əsərlər insanın daxili və mədəni səfərlərinə, ümumbəşəri təcrübəyə həsr olunub.

Sərgidə, həmçinin Dmitri Dadaşidzenin tərcüməsində Azərbaycan poeziyasının antologiyasına və Nadejda İsmayılovanın hekayələrinə çəkilmiş illüstrasiyalar nümayiş olunub.

Tədbirin qonaqları arasında təkcə Azərbaycan diasporunun nümayəndələri deyil, digər xalqlardan, habelə Çexiyadakı Azərbaycan və Türkiyə səfirliklərinin nümayəndələri də olub. Həmçinin Praqada və onun hüdudlarından kənarda tanınan şairlər, yazıçılar, rəssamlar, diplomatlar iştirak ediblər.

Onlar uzun müddət tədbirdən ayrılmayıb, maraqlı suallar verib, tarda və fortepianoda ifalarla çıxış edib, layihənin müəlliflərinə heyranlıqlarını ifadə ediblər.

Vüqar Seyidov

AZƏRTAC-ın xüsusi müxbiri

Praqa