Mehdi Abbasov 1 yanvar 1960-cı ildə Qərbi Azərbaycanın (Ermənistan) Amasiya rayonunun Yeniyol kəndində anadan olub. Ailəsi erməni millətçilərinin təzyiqi altında ata-baba ocağını tərk edib Qazaxıstana üz tutanda Mehdinin 11 yaşı var idi. Onlar Qazaxıstanın Tülkübas rayonunun Kulan kəndində məskunlaşıblar. 1980-cı ildə Mehdi sənədlərini Çimkənd Pedaqoji İnstitutunun hazırlıq şöbəsinə təqdim edib. Bir ildən sonra isə Karakanda Pedaqoji İnstitutuna daxil olub. O, 1985-ci ildə həmin ali məktəbi bitirərək ibtidai hərbi hazırlıq və bədən tərbiyəsi müəllimi ixtisasına yiyələnib. Klassik güləş üzrə idman normasını yerinə yetirən Mehdi "SSRİ idman ustası" adını alıb. 1989-1990-cı illərdə SSRİ DİN-nin Stavropol ali kurslarının müdavimi olub, sonra Enbəyşin Rayon Daxili İşlər Şöbəsində sahə müvəkkili vəzifəsində xidmətini davam etdirib.

Azərbaycanın başı üzərini qara buludlar alanda Mehdi öz soydaşlarının köməyinə gəlməyi qərara alıb. Mehdi 1991-ci il 28 iyun tarixində Azərbaycan Respublikası DİN-nin sərəncamına göndərilib. O, burada baş leytenant rütbəsində rota komandiri kimi DİN-nin XTMD-ndə xidmətə başlayıb.

Mehdi Abbasov döyüşlərdə göstərdiyi şücaətə görə 4 dəfə Daxili İşlər Nazirliyinin mükafatına layiq görülüb.

Onun son döyüşü 13 yanvar 1992-ci ildə olub. Məlikcan postu ətrafında qızğın döyüşlər gedirdi. Mehdi həmişə olduğu kimi yenə də ön xəttdə vuruşub. Bu ölüm-dirim mübarizəsində snayper gülləsi onu başından ağır yaralayıb. Döyüş dostu onu, çətinliklə də olsa, təhlükəli zonadan çıxara bilib. Lakin güllə öz işini görüb. Həmin gün o, əbədi olaraq gözlərini yumub. Vətən yolunda canını fəda edən Vətən övladı əslində ölmür, əksinə, ölümü ilə ölümsüzlük qazanır, şəhidlik adını yüksəldir.

Azərbaycan Respublikası Prezidentinin 1992-ci il 6 iyun tarixli 831 saylı Fərmanı ilə baş leytenant Abbasov Mehdi Yusif oğluna ölümündən sonra “Azərbaycanın Milli Qəhrəmanı” adı verilib.

Bakıda Şəhidlər Xiyabanında dəfn edilib.

İsmayıllı rayonunun keçmiş Ruşan kəndi indi cəsur döyüşçünün şərəfinə Mehdikənd adlanır. İsmayıllı rayonunun mərkəzi küçələrindən birinə onun adı verilib. 2018-ci ildə İsmayıllıda Mehdi Abbasovun həyat və döyüş yoluna həsr olunan "Xüsusi təyinat" filminin təqdimatı keçirilib.