Murad Telman oğlu Mirzəyev 1976-cı il mart ayının 31-də Sabirabad rayonunun Muğan Gəncəli kəndində anadan olub. 1991-1994-cü illərdə C.Naxçıvanski adına Hərbi Liseydə, 1994-1998-ci illərdə Türkiyə Ali Hərbi Quru Qoşunları Məktəbində təhsil alıb.

Bir müddət Gəncədəki "N" saylı hərbi hissədə xidmət edən baş leytenant Murad Mirzəyev daha sonra öz arzusu ilə Azərbaycan XTQ-də xidmətini davam etdirib. Cəsarəti, peşəkarlığı, böyük uğurları, yüksək bacarığı qiymətləndirilib, briqada komandiri vəzifəsinə qədər yüksələn Murad Mirzəyev dəfələrlə mükafatlandırılıb. Xidmətə başlamasının 10-cu ilində Murad Mirzəyev "Qüsursuz xidmətə görə" 3-cü dərəcəli medalı ilə, "Azərbaycan Respublikası Silahlı Qüvvələrinin 90 illiyi (1918-2008)", "Azərbaycan Respublikası Silahlı Qüvvələrinin 95 illiyi (1918-2013)", yubiley medalları və "Qızıl Ulduz" medalı ilə təltif olunub.

Ana dili ilə yanaşı, türk, rus, ingilis və erməni dillərini mükəmməl bilən Murad Mirzəyev peşəkar və yüksək hazırlıqlı kadr kimi Azərbaycan Ordusunu ölkə xaricində də yüksək səviyyədə təmsil edib və əcnəbilərin diqqətini çəkib.

2005-2007-ci illərdə ABŞ-ın Virciniya ştatında ingilis dili və xüsusi təyinatlılar üçün nəzərdə tutulmuş "Ranger" kursunu yüksək səviyyədə tamamlamaqla bir ilkə imza atıb. O, hələ ki, bu kursu bitirən yeganə azərbaycanlı hərbçidir. Sonrakı illərdə 8 ölkədə, o cümlədən Türkiyə, Ruminiya, Macarıstan, Yunanıstan, İordaniya Krallığındakı kursları da üstün dərəcə ilə başa vurub.

Murad Mirzəyev 2016-cı il Aprel Döyüşlərində komandiri olduğu qrupla birlikdə Talış kəndi ətrafındakı yüksəklikləri düşməndən azad edib və qəhrəmancasına həlak olub. 2016- cı il aprelin 11-də II Fəxri Xiyabanda dəfn olunub.

Ölümündən sonra Azərbaycan Respublikasının Prezidenti İlham Əliyevin Sərəncamı ilə Murad Telman oğlu Mirzəyev "Azərbaycanın Milli Qəhrəmanı" fəxri adına layiq görülüb.

Haqqında yazıçı Bəxtiyar Qaracanın "Bitməyən müharibənin qəhrəmanları" silsiləsindən "Muradına çatmayanlar: apreldən əvvəl və sonra" sənədli filmi çəkilib. Xatirəsini əbədiləşdirmək məqsədi ilə Bakı şəhərində yaşadığı binaya barelyefi vurulub.