Əliyev Nadir Alış oğlu 30 iyul 1962-ci ildə Ağdam rayonunun Əliağalı kəndində doğulub. 1977-ci ildə Əliağalı kənd tam orta məktəbinin səkkizinci sinfini bitirib, ailəsi ilə birlikdə Bakıya köçüb. Elə həmin il Bakı Politexnik Texnikumuna daxil olub. 1981-ci ildə texnikumu fərqlənmə diplomu ilə bitirib, az sonra hərbi xidmətə çağırılıb.

O, 1983-cü ildə əsgəri xidmətini Qazaxıstanın Leninsk şəhərində başa vurub, Bakı Tunel Tikinti İdarəsində əmək fəaliyyətinə başlayıb. Bir il tikintidə çalışdıqdan sonra 1984-cü ildə sənədlərini Bakı Dövlət Universitetinə verib və hüquq fakültəsinə daxil olub. 1986-cı ildə bir neçə tələbə ilə birlikdə onu Moskva DTK-nin Dzerjinsk adına Ali Hərbi Məktəbinə göndəriblər. Nadir Əliyev 1991-ci ildə təhsilini əla qiymətlərlə başa vuraraq Bakıya dönüb. Yüksək biliyini, təcrübəsini nəzərə alaraq, onu Milli Təhlükəsizlik Nazirliyinə işə qəbul ediblər. O, burada işləyə-işləyə BDU-da yarımçıq qalmış təhsilini də başa çatdırıb.

Qarabağda başlanan müharibə minlərlə insanı yurdsuz-yuvasız qoyub. Öz xahişilə onu döyüş bölgəsinə göndəriblər. Nadir Qarabağ və ətraf rayonlarda işlədiyi dövrdə cəsur bir döyüşçü, əməliyyatçı və həssas bir insan kimi əhalinin ümid yerinə çevrilib. Nadir Əliyev baş əməliyyat müvəkkili kimi Ağdam, Şuşa, Ağdərə, Ağcabədi rayonlarında əhalinin təhlükəsizliyinin təmin edilməsi üçün əlindən gələni əsirgəməyib.

1993-cü ilin iyul ayının əvvəlləri Ağdam sanki can üstəydi. Düşmən Qiyaslı kəndi istiqamətindən böyük qüvvə ilə Ağdam şəhərinə girməyə can atırdı. Qeyri-bərabər döyüşdə o, ana yurdu Ağdamın qoynunda əbədiyyətə qovuşub.

Ailəli idi. İki övladı var.

Azərbaycan Respublikası Prezidentinin 9 oktyabr 1994-cü il tarixli 218 saylı fərmanı ilə Əliyev Nadir Alış oğlu ölümündən sonra “Azərbaycanın Milli Qəhrəmanı” adına layiq görülüb.

Bakı şəhərində Şəhidlər Xiyabanında dəfn edilib.

Suraxanı rayonundakı 282 saylı tam orta məktəb Qəhrəmanın adını daşıyır. Yaşadığı binanın önünə xatirə lövhəsi vurulub.