Bakı Şəhər Mədəniyyət Baş İdarəsi Xəzər rayon Mərkəzləşdirilmiş Kitabxana Sisteminin 7 nömrəli filialı böyük demokrat, milli istiqlaliyyət uğrunda mübarizə aparmış, mollanəsrəddinçilər məktəbini yaratmış Cəlil Məmmədquluzadə publisistikasını təqdim edir.

Cəlil Məmmədquluzadə qüdrətli vətəndaş, yazıçı, publisist, ictimai xadimdir. C.Məmmədquluzadə Azərbaycan satirik publisistikasının yaradıcısıdır. Ədibin “Molla Nəsrəddin” jurnalı səhifələrində dərc olunmuş yüzlərlə felyetonları və publisistik məqalələri ilə milli satirik publisistika özünün ən kamil səviyyəsinə yüksəlib. Ədibin “Sizi deyib gəlmişəm”, “Necə qan ağlamasın”, “Niyə məni döyürsünüz”, “Millət”, “Qondarma bəylər”, “Firqələr davası”, “Yer yoxdur” və sairə kimi məqalələri buna nümunədir.

Mirzə Cəlilin publisistikasında da azərbaycançılıq mövzusu özünəməxsus yer tutur. Ədibin publisistikasının şah əsəri sayılmağa layiq olan məşhur “Azərbaycan” məqaləsi (1917) milli oyanış və siyasi intibah dövrünün həqiqi bədii manifestidir. "Azərbaycan" məqaləsi vətəndaş-ədib Cəlil Məmmədquluzadənin mahir qələmi ilə çəkilmiş Azərbaycan məmləkəti coğrafiyasının nadir publisistik xəritəsidir:

“Bəzi vaxt otururam və papağımı qabağıma qoyub fikrə gedirəm, xəyalata cumuram. Özümdən soruşuram ki:

-Mənim anam kimdir?

Öz-özümə də cavab verirəm ki:

-Mənim anam rəhmətlik Zöhrəbanu bacı idi.

-Dilim nə dilidir?

-Azərbaycan dilidir.

-Yəni Vətənim haradır?

-Azərbaycan vilayətidir.

-Haradır Azərbaycan?

-Azərbaycanın çox hissəsi İrandadır ki, mərkəzi ibarət olsun Təbriz şəhərindən. Qalan hissələri də Gilandan tutmuş qədim Rusiya höküməti ilə Osmanlı höküməti daxilindədir..”

Mirzə Cəlilin fikrincə, “qələmin müqəddəs vəzifəsi xalqa xidmət etməkdir”.

Ədibin “Təzə partilər”, “Azadeyi-vicdan”, “Xoşbəxtlik”, “Firqələr davası” və sair məqalələrində Azərbaycan cəmiyyətində insan haqları, konstitusiya hüquqları kimi məsələlər haqqında yetkin qənaətlər ifadə olunub.