Barat Həbib qızı Şəkinskaya 1914-cü il iyunun 28-də Şuşada, bəyzadə ailəsində anadan olub. İlk təhsilini Şuşada alan Barat Şəkinskaya, 1923-cü ildə ailəsi ilə birlikdə Gəncəyə köçüb. 13 yaşından Gəncə Qadınlar Klubunun dram dərnəyində iştirak edib. 1930-cu ildə pedaqoji məktəbi bitirərək müəllim kimi çalışıb, 1933- cü ildə isə Gəncə Türk İşçi Teatrosunun truppasına aktrisa götürülüb. Yaradıcılığının əsas dövrü 1935-ci ildən etibarən Akademik Milli Dram Teatrı ilə bağlı olub.

Barat Şəkinskaya həm də Azərbaycanın ilk oğlan rolları oynayan aktrisası olub. Onun Gəncə Teatrında Kostya, Bakıda 1939-cu ildə oynadığı Napoleon obrazları yüksək bədii-estetik məziyyətləri ilə teatr tariximizə yazılıb. Aktrisa çoxlu sayda uşaq rolları da oynayıb. Axırıncı dəfə o, uşaq rolunu 37 yaşında yaradıb. Bu, Məhəmmədhüseyn Təhmasibin “Çiçəklənən arzular” pyesində 7-ci sinif şagirdi Nazlı rolu olub.

“Azərbaycan səhnəsinin Cülyettası” deyə çağırılan Barat Şəkinskaya 1935-ci ildən Xalq artisti Mustafa Mərdanovun təşəbbüsü ilə radio verilişlərinə cəlb olunub. 1943-cü ildə yenidən Gəncəyə qayıdaraq buradakı Dövlət teatrının yaradıcı kollektivinə üzv olub. 1956-cı ildə aktrisa ərizə ilə növbəti məzuniyyətə çıxıb, lakin sonra işə qayıtmayıb. 4 il “Azərbaycanfilm” kinostudiyasında aktrisa, filarmoniyada aparıcı, yenicə açılan televiziyada diktor işləyib.

Sonralar “O olmasın, bu olsun”, “Qızmar günəş altında”, “Kölgələr sürünür”, “Qəribə əhvalat”, “Telefonçu qız”, “Evin kişisi”, “Onun bəlalı sevgisi” filmlərində müxtəlif rollarda çəkilib. 1960-cı ildə onun həyat yoldaşı Mehdi Məmmədov Akademik Dram Teatrına baş rejissor təyin ediləndən sonra Barat xanım və başqa aktyorlar da teatra qayıdıblar.

1970-ci ildə Sumqayıtdakı Hüseyn Ərəblinski adına Dövlət Dram Teatrında aktrisa kimi işləməyə başlayıb, 1971-ci ildə yenidən Akademik Dram Teatrında işini davam etdirib. 1978-ci ildə təqaüdəçıxan aktrisa, 1986-cı ildə “Xatirələrim” kitabını nəşr etdirib. Qazandığı sənət nailiyyətlərinə görə 1940-cı ildə Azərbaycanın “Əməkdar artisti”, Milli teatrımızın yaranmasının 75 illiyi münasibətilə 1949-cu il iyulun 21-də isə “Xalq artisti” fəxri adlarına layiq görülüb.

Barat Şəkinskaya 1999-cu il yanvar ayının 14-də vəfat edib.