Azərbaycan Bəstəkarlar İttifaqının Üzeyir Hacıbəyli Konsert salonunda İttifaqın sədri, tanınmış bəstəkar, Xalq artisti, dünyanın “Sülh artisti”, AMEA-nın müxbir üzvü, professor Firəngiz Əlizadə ilə elm və incəsənət xadimlərinin yaradıcılıq görüşü keçirilib.

AZƏRTAC xəbər verir ki, tədbir musiqisi və sözləri Firəngiz Əlizadəyə aid olan “Zəfər marşı”nın səslənməsi ilə başlayıb.

Tədbirin aparıcısı sənətşünaslıq üzrə fəlsəfə doktoru, Əməkdar mədəniyyət işçisi Səadət Təhmirazqızı qonaqları salamlayaraq qeyd edib ki, bu görüş həm də bəstəkarın 2023-cü il üçün yaradıcılıq hesabatıdır.

Firəngiz Əlizadəyə ilk növbədə Azərbaycan Bəstəkarlar İttifaqının 2023-cü ildə reallaşdırdığı layihələrdən, xüsusən də, Ulu Öndər Heydər Əliyevin anadan olmasının 100 illiyi ilə əlaqədar “Heydər Əliyev 100” silsiləsindən təşkil olunmuş tədbirlərdən danışıb.

Sonra o, özünün yaradıcılıq hesabatı olaraq dünyanın müxtəlif ölkələrində məşhur musiqiçilər tərəfindən ifa olunan əsərlərindən söz açıb. Onun bu fikirlərini təsdiq edən afişalar, konsertlərdən fotolar nümayiş olunub. Firəngiz xanım bu tarixi sənədləri şərh edərək onlar haqqında tədbir iştirakçılarına ətraflı məlumat verib.

Bəstəkarın çıxışından sonra Rusiya Televiziyasının “Mədəniyyət” Kanalında nümayiş olunan “Eniqma” verilişinin Firəngiz Əlizadəyə həsr olunan buraxılışının videoyazısı təqdim olunub.

Tədbirin sonunda iştirakçıların Firəngiz Əlizadəyə ünvanlandığı suallar cavablandırılıb.