Bakı Şəhər Mədəniyyət Baş İdarəsinin təşkilatçılığı ilə Səbail rayon Mərkəzləşdirilmiş Kitabxana Sisteminin Mərkəzi Kitabxanasında Azərbaycan ədəbiyyatının görkəmli nümayəndəsi, qüdrətli şair və böyük maarif xadimi Seyid Əzim Şirvaninin anadan olmasının 190 illik  yubileyinə həsr olunmuş “Şamaxıdan doğan günəş” adlı tədbir keçirilib.

Tədbirdə filologiya üzrə  fəlsəfə doktoru,ədəbiyyatşünas Mətanət  Vahid, Nizami  Gəncəvi  adına Milli Azərbaycan Ədəbiyyatı muzeyinin  Beynəlxalq Əlaqələr və dünya muzeyləri  şöbəsinin böyük  elmi  işçisi, filologiya üzrə  fəlsəfə doktoru Gülnar  Əqiq, Milli  Azərbaycan  Tarix  Muzeyinin aparıcı  elmi  işçisi  Əli Fərhadov, 189-190 nömrəli tam orta  məktəbin  Azərbaycan dili  və  ədəbiyyat  müəllimi Səadət Budaqova,Səbail rayon MKS-nin direktoru Nərmin Xəlilova və  kitabxananın əməkdaşları iştirak  ediblər.

Tədbirdə Seyid  Əzim  Şirvaninin  həyat  və  yaradıcılığını  əks  etdirən  videoçarx  nümayiş  olunub,dahi  şairin  ədəbi  irsi, pedaqoji,maarifçilik fəaliyyəti və klassik Azərbaycan poeziyasına verdiyi töhfələr haqqında çıxışlar edilib. Qeyd olunub ki, Seyid Əzim Şirvani yalnız şair deyil, eyni zamanda elm və təhsilin inkişafında, cəmiyyətin mənəvi yüksəlişində mühüm rol oynamış maarifçi  ziyalı  olub.

Vurğulanıb  ki, Seyid Əzim Şirvani yaradıcılığı boyu həm Şərq poeziyasının çoxəsrlik ənənələrini yüksək sənətkarlıqla davam etdirib, həm də mühüm ictimai-siyasi dəyişikliklərin baş verdiyi bir şəraitdə Azərbaycan ədəbiyyatının yeni maarifçilik ideyaları ilə zənginləşməsində əhəmiyyətli rol oynayıb.

Həmçinin iştirakçılar şairin bir sıra qəzəllərini səsləndirərək tədbirə poetik ruh və səmimiyyət qatıblar.