Bakı Şəhər Mədəniyyət Baş İdarəsinin və Azərbaycan Mədəniyyət İşçiləri Həmkarlar İttifaqı Respublika Komitəsinin birgə təşkilatçılığı ilə Beynəlxalq Muğam Mərkəzində 8 Noyabr-Zəfər Gününə həsr olunmuş “Şanlı Zəfər tariximiz” adlı konsert keçirilib.

Tədbir Azərbaycan Respublikasının Dövlət Himninin səsləndirilməsi və şəhidlərimizin əziz xatirəsinin bir dəqiqəlik sükutla yad edilməsi ilə başlayıb.

Daha sonra qeyd olunub ki, Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Ordumuzun otuz ilə yaxın düşmən işğalı altında olan torpaqları azad etməsi və ölkəmizin ərazi bütövlüyünün bərpa olunması müstəqil dövlətçilik tariximizin ən şərəfli səhifəsidir.

Konsertdə Xalq artisti, tarzən və ud ifaçısı Mircavad Cəfərovun rəhbərlik etdiyi “Cəngi” estrada folklor ansamblı çıxış edib. Ansamblın təqdim etdiyi rəngarəng və zəngin repertuar izləyicilərə dərin təsir bağışlayıb, tamaşaçılar konsertdən böyük zövq alıblar.

Həmçinin konsertdə Vətən müharibəsi qazisi, xanəndə Məbud Əhmədov “Bura vətəndir” mahnısı ilə çıxış edib.

Qeyd edək ki, Prezident İlham Əliyevin imzaladığı Sərəncamlara əsasən Məbud Əhmədov “Füzulinin azad olunmasına görə”, “Cəbrayılın azad olunmasına görə”, “Xocavəndin azad olunmasına görə” medalları , Baş Nazir tərəfindən isə “Vətən müharibəsi iştirakçısı” medalı ilə təltif edilib.