Bakı Şəhər Mədəniyyət Baş İdarəsinin tabeliyində olan Mərdəkan Mədəniyyət Sarayının və Xəzər Rayon İcra Hakimiyyətinin birgə təşkilatçılığı ilə 8 Noyabr -Zəfər Gününə həsr olunmuş “5 illik Zəfər Səlnaməsi” adlı tədbir keçirilib.

Öncə tədbir iştirakçıları Sarayın foyesində təşkil edilmiş Azərbaycan Rəssamlar İttifaqının və Naxçıvan Muxtar Respublikası Rəssamlar Birliyinin üzvü Ramil Əhmədovun əl işlərindən ibarət rəsm sərgisi ilə tanış olublar.

Tədbir Azərbaycan Respublikasının Dövlət Himninin səsləndirilməsi ilə başlayıb və şəhidlərimizin xatirəsi bir dəqiqəlik sükutla yad edilib.

Daha sonra Şanlı Zəfərimizə, tarixi qələbəmizə həsr olunmuş “Qızıl payız” adlı sənədli film nümayiş olunub.

Tədbiri açıq elan edən aparıcı vurğulayıb ki, bu gün biz Azərbaycan xalqının şanlı tarixində ən qürurlu, ən əziz səhifələrdən birini — Böyük Qələbəmizin 5-ci ildönümünü qeyd edirik!

Çıxışçılar Zəfər Günü ilə bağlı tədbir iştirakçılarını təbrik edərək 44 günlük Vətən Müharibəsinin Azərbaycanın tarixinə qızıl hərflərlə əbədi yazıldığını bildiriblər.

Bədii hissədə tanınmış incəsənət xadimləri və estrada müğənniləri, “Səma” rəqs ansamblı çıxış ediblər.