Noyabrın 4-də Azərbaycan Milli İncəsənət Muzeyində “Azərbaycan incəsənət xəzinəsi” adlı yeni daimi ekspozisiyanın açılış mərasimi keçirilib. 44 günlük Vətən müharibəsində qazanılmış şanlı Zəfərin 5 illiyinə həsr olunan ekspozisiya minilliklər boyu formalaşmış milli incəsənət irsimizi, xalqın yaradıcılıq düşüncəsini və bədii zövqünü nümayiş etdirir.

Tədbirdə sənətşünaslıq üzrə fəlsəfə doktoru, dosent, Muzeyin direktoru Şirin Məlikova, tarix elmləri doktoru, akademik, Milli Azərbaycan Tarixi Muzeyinin direktoru Nailə Vəlixanlı, Xalq rəssamı Salhab Məmmədov çıxış ediblər. Natiqlər Zəfər Günü ərəfəsində açılan bu ekspozisiyanın Azərbaycan xalqının dünya mədəniyyətinə bəxş etdiyi nadir sənət incilərini bir araya gətirməklə, milli qürur və azadlıq ruhunun bədii təcəssümü olduğunu vurğulayıblar.

Qonaqlar daha sonra ekspozisiya ilə tanış olublar.

Yeni daimi ekspozisiya Azərbaycan incəsənətinin Tunc dövründən XIX əsrədək keçdiyi inkişaf yolunu ardıcıl və elmi əsaslarla təqdim edir. Tunc və antik dövrlərə aid keramika, metal məmulatlar, kiçik plastika nümunələri, balbal heykəlləri, orta əsr ağacoyma və misgərlik əsərləri, eləcə də xalçaçılıq, zərgərlik və bədii tikmə sənətinin nadir nümunələri burada nümayiş olunur.

Ekspozisiyada Səfəvilər və Qacarlar dövrlərinə aid keramika, kaşı və miniatür nümunələri, Mirzə Qədim İrəvani və Mir Möhsün Nəvvab kimi sənətkarların əsərləri də yer alır. İlk dəfə olaraq arxeoloji materialların tapıldığı ərazilər xəritə üzərində əyani şəkildə göstərilir, qara cilalı keramikanın hazırlanma prosesi isə animasiya filmi vasitəsilə təqdim olunur.

Yeni ekspozisiya Azərbaycan incəsənətinin zənginliyini və çoxəsrlik bədii irsimizin canlı təqdimatını özündə birləşdirir.