“Mirvarid Dilbazi Poeziya Məclisi” İctimai Birliyinin sədri, “Kəlağayı ev muzeyi”nin direktoru, şair-publisist Güllü Eldar Tomarlının "Kəlağayı bayramı" kitabı çapdan çıxıb.

AZƏRTAC xəbər verir ki, Azərbaycan Kəlağayısı Gününə dəyərli töhfə olan bu kitabın redaktoru Vaqif Osmanlıdı.

Qeyd edək ki, müəllif tərəfindən son illər sülh və barış rəmzi olan milli kəlağayılarımızın təbliği və tədqiqi istiqamətində bir çox işlər görülüb. Belə ki, onun müəllif olduğu, təqdim və tərtib etdiyi "Azərbaycan kəlağayısı min illərin yadigarı", "Kəlağayı əlvan qıyqacı", "Babamın papağı, nənəmin kəlağayısı", "Kəlağayı milli sərvətimizdir" (Azərbaycan, rus və gürcü dillərində) və digər kitabları buna bariz nümunədir.

Son illərdə bu istiqamətdə görülən işlər barədə məlumat verən müəllif deyib: “Azərbaycan Respublikası Qeyri-Hökumət Təşkilatları Dövlət Agentliyinin kiçik qrant müsabiqəsinin qalibi olan layihələrimiz - "Kəlağayı əlvan qıyqacı", “Azərbaycan kəlağayısı min illərin yadigarı”, “Azərbaycan kəlağayılarının təbliği”, “ Milli baş geyimi və örtükləri” layihələrimiz “Mirvarid Dilbazi Poeziya Məclisi” tərəfindən uğurla icra olunaraq maraqla qarşılanıb. Hazırda bu istiqamətdə işlərimizi davam etdiririk. “Mirvarid Dilbazi Poeziya Məclisi” və “Kəlağayı ev muzeyi” noyabrın 1-dən 26-na kimi respublikamızda “Kəlağayı bayramı” keçirir. 26 Noyabr - Azərbaycan Kəlağayısı Günündə Mədəniyyət Nazirliyinin dəstəyi, “Mirvarid Dilbazi Poeziya Məclisi” İctimai Birliyinin təşkilatçılığı ilə Rəşid Behbudov adına Dövlət Mahnı Teatrında geniş tədbir keçiriləcək. Məqsədim Azərbaycan Kəlağayısı Gününün hər yerdə qeyd olunmasına nail olmaq və gündəmdə saxlamaqdı”.