Azərbaycanın zəngin tarixi və mədəni irsini dünyaya tanıdan “İRS” beynəlxalq jurnalının italyan dilində növbəti nömrəsi nəşr olunub.

Jurnalın bu sayında 2024-cü ilin noyabrında Bakının ev sahibliyi etdiyi BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının – COP29-un əhəmiyyətindən bəhs olunur, İtaliyanın Baş naziri Corcia Meloninin də qatıldığı bu tədbirdə mühüm qlobal ekoloji problemlərin müzakirə edildiyi vurğulanır. Ölkəmizin həyata keçirdiyi bərpaolunan və “yaşıl enerji” layihələrindən, Qarabağda və Şərqi Zəngəzurdakı “ağıllı şəhər”, “ağıllı kənd” konsepsiyalarına əsaslanan bərpa və yenidənqurma işlərindən, “yaşıl enerji” zonasının yaradılması istiqamətində atılan addımlardan bəhs edilir.

Jurnalda İtaliyanın Azərbaycandakı səfiri Luka Di Canfrançeskonun iki ölkə münasibətlərindən, innovasiyalar sayəsində genişlənən körpü, mədəni və akademik əlaqələr barədə fikirləri də yer alıb. Səfir İtaliya ilə Azərbaycan arasında dostluğun dərin köklərinin olduğunu, ən yüksək səviyyəli çoxsaylı səfərlər sayəsində ikitərəfli əlaqələrin strateji tərəfdaşlıq səviyyəsinə yüksəldiyini bildirib.

Bundan başqa, "İrs"in italyanca növbəti sayında məşhur memar Zaha Hadidin layihəsi olan Bakıdakı Heydər Əliyev Mərkəzi haqqında məlumatlara yer verilib. Azərbaycanın dünyanın ən qədim kilsələrindən biri olan Alban Apostol kilsəsinin vətəni olduğu bildirilir, Alban-Udi Xristian Dini İcmasından bəhs edilir.

Nəşrdə Azərbaycanın işğaldan azad olunmuş ərazilərinin mina və partlamamış hərbi sursatlarla çirklənmə səviyyəsi barədə məlumatlar oxucuların diqqətinə çatdırılır.

Jurnalda Azərbaycan qadınlarının hər zaman ölkənin gələcəyinin formalaşmasında həlledici rol oynadığı qeyd olunur, ölkəmizin inkişafına tərəqqisinə və töhfə verən qadınlar haqqında ətraflı məlumat verilir. Həmçinin Azərbaycan musiqisi və muğam haqqında, eyni zamanda, milli mətbəx nümunələrimiz və içkilər barədə məlumatlar nəşrdə yer alıb.