Hacı Murad Hacı Əhməd oğlu Yegizarov 1939-cu ilavqustun 18-də Bakıda anadan olub. Hələ məktəbdə oxuduğu dövrdə dram dərnəyində çıxış edib. Çıxışı izləyən görkəmli aktyor Ələsgər Ələkbərov ona Teatr İnstitutuna daxil olmağı məsləhət görüb. Hacı Murad Yegizarov Azərbaycan Dövlət İncəsənət İnstitutunun aktyorluq fakültəsində Məhərrəm Haşımovun kursunda təhsil alıb.

Ötən əsrin 60-70-ci illərində teatrın səhnəsində qoyulan "Sən niyə yaşayırsan?", "Həyat necə də qısadır", "Pik saatı", "Öz yolunla" və digər tamaşalardakı rolları onun özünəməxsus dəst-xəttinin başlanğıcı olub. Bu dəst-xətti isə "Valentin və Valentina"da Qusev, "İvanov"da doktor Lvov, "Qumluqdakı ev"də Eldar, "Aydın"da Dövlət bəy, 80-ci illərdə ilk dəfə rus dilində tamaşaya qoyulmuş "Şeyx Sənan"da Şeyx Sənan, "Arzu tramvayı"nda Stenli Kovalski və bugünkü günədək Azərbaycan və dünya ədiblərinin 200-dən çox dolğun səhnə təcəssümü deməkdir.

Azərbaycandan başqa, H.M.Yegizarov Çexiyada, Gürcüstanda, Almaniyada 40-dan çox filmə də çəkilib. Şux qaməti, istedadı kinorejissorların da diqqətini cəlb edib və ona elə instituta qəbul olunduğu il yəni 1958-ci ildə iki filmə çəkilmək təklif edilib. Həmin il rejissor Həbib İsmayılov onu “Ögey ana” filmində çəkib. M.Yegizarov kinoya ilk gəlişi barədə deyib: “İlk dəfə məni “Uzaq sahillərdə” filminin baş qəhrəmanı olan Mehdi obrazının sınaq çəkilişlərinə dəvət ediblər. Yaş baxımından Mehdi obrazına uyğun gəlmədiyim üçün sınaqdan uğursuz çıxdım”. Lakin Həbib İsmayılov onun fotoşəklini görən kimi Ayaz rolunu ona həvalə etməyi qərara alır. Beləliklə, aktyor bundan sonra öz taleyini bu sənətə bağlayacağını deyir. İnstitutda təhsil aldığı illərdə ardıcıl olaraq filmlərdə çəkilməyə dəvət alır.

Baxmayaraq onu “Uzaq sahillərdə” filmində baş rola təsdiq etməyiblər, o filmdə epizodda oynayıb, hətta həmin filmin materialları əsasında 1960-cı ildə yaradılan “Mateo Falkone” filmində də ona epizodik rol verilib.

Ümumiyyətlə, H.Yegizarovun kino bioqrafiyasında müxtəlif xarakterli obrazlar var. “Arşın mal alan” filminin II variantında Tofiq Tağızadə ona Süleyman rolunu həvalə edib. I variantda bu rolu məşhur aktyor İsmayıl Əfəndiyev çox uğurla oynayıb. Yegizarov bu rolu oynayanda çalışıb ki, təkrar alınmasın, Süleyman məhz Üzeyir bəyin yaratdığı kimi dost təsiri bağışlasın və buna nail olub.

Rejissor Həbib İsmayılov onu ikinci dəfə “Böyük dayaq” filmində çəkib. 1961-ci ildə istehsal olunan bu kinolentdə ona partkom Şirzadın obrazı həvalə olunub. Kənd həyatı ilə tanış olmadığından Şirzad onun üçün bir qədər çətin rol idi. Amma aktyor bu çətinliyin də öhdəsindən uğurla gəlib.

“Ulduz” filmi də onun kino yaradıcılığında əhəmiyyətli yer tutur. Bu filmdə rejissor Ağarza Quliyev aktyora Bəxtiyar rolunu verib. Aktyor Bəxtiyarı sevərək yaradıb və onu da tamaşaçılara sevdirə bilib. Bəxtiyar H.Yegizarovun yaddaqalan maraqlı rollarındandır. Əslində bu rol onun 1969-cu ildə lentə alınmış “Bir cənub şəhərində” filmində yaratdığı Çingiz roluna bir qədər yaxın idi.

Hacımurad Yegizarov sonralar daha tez-tez filmlərə dəvət alır. “Bağ mövsümü” filmində Kələntər, “Nizami” filmində Atabəy, “Babək”, “Birisigün, gecəyarısı”, “İnsan məskən salır”, “Qara gölün cəngavərləri”, “O qızı tapın”, “Səmt küləyi”, “Şeytan göz qabağında” və başqa filmlərdə yaddaqalan maraqlı rollar ifa edib.

Aktyor 1974-cü ildə “Əməkdar artist”, 1982-ci ildə “Xalq artisti” fəxri adlarına, 1986-cı ildə Dövlət Mükafatına layiq görülüb.