10 mart Milli Teatr Günü münasibətilə Akademik Milli Dram Teatrında Mədəniyyət Nazirliyi, Teatr Xadimləri İttifaqı və Azərbaycan Dövlət Akademik Milli Dram Teatrının təşkilatçılığı ilə təntənəli tədbir keçirilib.

Tədbirdə dövlət və hökumət nümayəndələri, teatrın əməkdaşlıq haqqında Memorandum imzaladığı türkdilli ölkələrin milli teatrlarının rəhbərləri, mədəniyyət xadimləri, Azərbaycanın paytaxt və bölgə teatrlarının rəhbərliyi və əməkdaşları iştirak edib.

Əvvəlcə qonaqlar üçün mətbuat konfransı təşkil olunub. Akademik Milli Dram Teatrının direktoru, əməkdar mədəniyyət işçisi İlham Əsgərov teatrın beynəlxalq əlaqələri haqqında məlumat verib, tədbirin əhəmiyyətindən danışıb.

Qeyd olunub ki, növbəti ildə də Milli Teatr Günü Akademik Milli Dram Teatrında türkdilli ölkələrin nümayəndələri ilə birgə keçiriləcək.

Teatrın foyesində təşkil olunan “Türk dünyası: ortaq köklər və dəyərlər” adlı sərgi iştirakçılar tərəfindən maraqla qarşılanıb.

Azərbaycan Dövlət Mahnı və Rəqs Ansamblının çıxışı ilə başlayan tədbirdə Prezident İlham Əliyevin teatra göstərdiyi diqqət və qayğı qeyd olunub, mədəniyyət naziri Adil Kərimlinin tədbir iştirakçılarına təbrik məktubu oxunub.

Mədəniyyət nazirinin müavini Murad Hüseynov və Özbəkistanın ölkəmizdəki səfiri Bahrom Aşrafxanov tədbirin əhəmiyyətindən danışaraq, Azərbaycan teatrın tarixi və bugünkü uğurları haqqında çıxış edib. Qeyd olunub ki, Azərbaycan teatrları öz repertuarını zənginləşdirməklə yanaşı, müxtəlif beynəlxalq festivallarda Azərbaycanı uğurla təmsil edir.

Azərbaycan Teatr Xadimləri İttifaqının “Sənətkar” medalı Özbəkistanın və Tacikistanın Xalq artisti Yodqar Sağdiyevə, Türkiyə Respublikası Mədəniyyət və Turizm Nazirliyi Dövlət Teatrlarının Genel Müdiri Tamer Karadağlıya, Adana Çukurova Universiteti Dövlət Konservatoriyasının professoru, Xalq artisti Cahangir Novruzova, İstanbul Böyükşəhər Bələdiyyəsi Şəhər Teatrlarının baş bədii rəhbəri, Ayşəgül İşseverə, İstanbul Böyükşəhər Bələdiyyəsi Şəhər Teatrlarının aktrisası, Əməkdar incəsənət xadimi Məlahət Kalyoncuya, Azərbaycan Dövlət Akademik Milli Dram Teatrının direktoru, Əməkdar mədəniyyət işçisi İlham Əsgərova, Xalq artisti Samir Cəfərova, Xalq artisti Mehriban Zəkiyə və Əməkdar artist Anar Heybətova təqdim olunub.

“Teatr xadimi” medalı Qazaxıstan Milli Dram Teatrının direktoru Erkin Juasbekə təqdim olunub.

Daha sonra “Qızıl Dərviş” mükafatı ilə təltif olunublar: “Dar ağacı” tamaşasına görə Şəki Dövlət Dram Teatrının direktoru, Əməkdar incəsənət xadimi Mirbala Səlimli, Əməkdar artist Rauf Ağakişiyev (Sumqayıt Dövlət Dram Teatrı), Gəncə Dövlət Milli Dram Teatrının aktrisası Zəminə Cəfərova. “Qızılgül” mükafatı Xalq artisti Şükufə Yusupovaya təqdim olunub.

Ötən il Milli Teatr Günündə təsis olunmuş Akademik Milli Dram Teatrının “Milli Teatr Mükafatı”ları Mədəniyyət Nazirliyi İncəsənət siyasəti şöbəsi İfa sənətləri sektorunun müdiri Böyükxanım Talıbova tərəfindən təqdim edilib. Mükafata Xalq artistləri Məleykə Əsədova, Yusif Eyvazov, Afaq Bəşirqızı, Bəxtiyar Xanızadə, Yasin Qarayev, Əməkdar incəsənət xadimi, Sənətşünaslıq elmləri doktoru, professor İlham Rəhimli layiq görülüb.

“Teatr dünyası” mükafatı ilə isə Akademik Milli Dram Teatrının Çin teatrları ilə əlaqələrinin qurulmasında xidmətlərinə görə Song Guangxiao, Akademik Milli Dram Teatrının direktor müavini Hacıbaba Məmmədov təltif olunub.

“Qızıl pərdə” mükafatları Akademik Milli Dram Teatrının direktoru, Əməkdar mədəniyyət işçisi İlham Əsgərov tərəfindən təqdim olunub. Xalq artisti Lyudmila Duxovnaya, Əməkdar artistlər Rita Əmirbəyova, Elşən Cəbrayılov, Münəvvər Əliyeva, Məsmə Aslanqızı, Rövşən Kərimduxt və “Əsa” teatrı mükafata layiq görülüb.

Mükafatlandırılma mərasiminin sonunda Elnur Qədirov Azərbaycan Dövlət Akademik Milli Dram Teatrının tədbir, tamaşa və layihələrinin Azərbaycan Dövlət Televiziyası vasitəsilə işıqlandırılmasında göstərdiyi dəstəyə görə Akademik Milli Dram Teatrının Diplomu ilə təltif olunub.

Təntənəli tədbirdən sonra Mədəniyyət Nazirliyinin “Zəfərdən qələmə” pyes müsabiqəsinin qalibi yazıçı Pərviz Seyidlinin Əmir Teymurun həyatı və döyüş yoluna həsr olunan, milli kimlik və milli özünüdərk ideyasına söykənən “Ləng: zamanla yarışan insan” tamaşasının premyerası da olub. Səhnə əsərinin quruluşçu rejissoru Əməkdar artist Bəhruz Vaqifoğludur.