Bakı Şəhər Mədəniyyət Baş İdarəsi Xəzər rayon Mərkəzləşdirilmiş Kitabxana Sisteminin 3 nömrəli filialında “Zəfər Günü”nə həsr olunmuş tədbir keçirilib. Tədbirdə kitabxana əməkdaşları, Buzovna qəsəbəsindəki 125 nömrəli tam orta məktəbin müəllim və şagirdləri iştirak ediblər.

Tədbir Azərbaycan Respublikasının Dövlət Himninin səsləndirilməsi ilə başlanıb. Sonra şəhidlərin əziz xatirəsi bir dəqiqəlik sükutla anılıb.

Məktəbin şagirdləri vətənpərvər mövzuda şeirlər səsləndiriblər.

44 günlük Vətən müharibəsinin ürəyimizə məlhəm olan Zəfər günü. Bu günü bütün Azərbaycan xalqı 30 il gözləyib. Gözlədikcə güclənib, gücləndikcə düşmənə nifrəti daha çox artıb. Ataların, anaların, körpələrin qisasını alacaq oğullar böyüyüb bu ölkədə. Vətənə olan sevgisi ilə dünyanı mat qoyub Azərbaycan əsgəri. Döyüşüb, qanı ilə, canı ilə torpağımızı, Qarabağımızı mənfur düşmən əlindən geri alıb. Bəli, bu Zəfər bizim xalqımızın və Azərbaycan Respublikasının Prezidenti İlham Əliyevin zəfəri olub. Qoy torpağımıza göz dikən hər kəs görsün ki, torpaqdan pay olmaz. Ədalət öz yerini tapdı.

Allah Vətən uğrunda canından keçmiş şəhidlərimizə rəhmət eləsin, qazilərimizə şəfa versin. Bu gün biz müasir Azərbaycan tarixinin ən qürurlu günlərini yaşayırıq. Qarabağ Azərbaycandır!