Fevralın 26-da Bakı Şəhər Mədəniyyət Baş İdarəsinin təşkilatçılığı ilə Yasamal rayon Heydər Əliyev Mərkəzində “Torpağı sanı yaşayasan” qısametrajlı bədii film nümayiş edilib.

Film nümayişində Azərbaycan Memarlıq və İnşaat Universiteti nəzdində İnşaat Kollecinin müəllim və tələbələri, 38, 52 nömrəli tam orta məktəblərin şagirdləri iştirak ediblər.

İştirakçılar öncə İnşaat Kollecinin tələbələrinin Xocalı faciəsinə həsr olunmuş əsərlərindən ibarət rəsm sərgisi ilə tanış olublar.

Tədbir Xocalı faciəsi qurbanlarının xatirəsinin bir dəqiqəlik sükutla yad edilməsi ilə başlayıb.

Çıxış edənlər Xocalı soyqırımı haqqında məlumat veriblər və bu faciənin insanlığa qarşı törədilən ən ağır cinayət olduğunu bildiriblər.

Sonra iştirakçılar Mədəniyyət Nazirliyi və Azərbaycan Respublikasının Kino Agentliyinin  dəstəyi ilə çəkilmiş “Torpağı sanı yaşayasan” qısametrajlı bədii filmini izləyiblər.

Film, Vətən müharibəsinin tarixi əhəmiyyətini, xalqımızın mübarizə və qəhrəmanlıq ruhunu əks etdirir.

Qeyd edək ki, filmin rejissoru Samir Kərimoğlu, prodüseri Zaur Mirzəzadədir.