Bakı Şəhər Mədəniyyət Baş İdarəsi Sabunçu rayonu Mərkəzləşdirilmiş Kitabxana Sisteminin 8 nömrəli filialı görkəmli yazıçımız Cəlil Məmmədquluzadənin doğum günü ilə əlaqədar “Tənqidi-realist satirik ədəbiyyatının görkəmli yaradıcısı" başlığı altında virtual sərgi hazırlayıb.

Cəlil Məmmədquluzadə 10 fevral 1869-cu ildə Naxçıvan şəhərində kiçik tacir ailəsində anadan olub. Cəlil Məmmədquluzadə 1873-1876-cı illərdə Molla Əli Hüseynzadənin, 1877-1879-cu illərdə isə Hacı Molla Bağırın məktəbində oxuyub. Ədib ərəb və fars dillərini də həmin vaxtda öyrənib.

Qori Müəllimlər Seminariyasının Azərbaycan şöbəsinin müfəttişi A.O.Çernyayevski Azərbaycanın rayonlarını gəzərək seminariyaya oxumaq üçün tələbələr seçirdi. O, 1882-ci ildə Naxçıvana gəlmiş və Cəlil Məmmədquluzadəni başqa şagirdlərlə birlikdə təhsil alması üçün siyahıya alıb.

Cəlilin bu məktəbdə oxumağında müəllim Əli Məmməd Xəlilovun xüsusi rolu olub. Cəlil Məmmədquluzadə 1887-ci ildə seminariyanı bitirir və müəllimlik atestatı alır. O 1887-1897-ci illər arasında İrəvan quberniyasının Uluxanlı, Naxçıvan mahalının Baş Noraşen (indiki Şərur rayonunda Cəlilkənd) və Nehrəm kəndlərində müəllimlik edib.

Cəlil Məmmədquluzadə Azərbaycan ədəbiyyatı tarixində görkəmli jurnalist və publisist olmaqla yanaşı həm də böyük bir dramaturq və nasir kimi tanınıb. Kəndlərdə müəllim işlədiyi dövrdə bir sıra kiçik hekayələrini həmçinin "Danabaş kəndinin əhvalatları" povestini yazıb.

Ədibin ilk qələm təcrübəsi " Çay dəstgahı" alleqorik dramı olub. Onun "Ölülər" komediyası 1916-cı ildə Bakıda, 1921-ci ildə isə Təbrizdə tamaşaya qoyulub. "Kamança" pyesi 1920-ci ildə Şuşada, 1927-ci ildə "Dəli yığıncağı" tragikomik pyesi Bakıda yazılıb. "4 pərdəli ər" pyesi 1930-cu ildə qələmə alınıb.

Cəlil Məmmədquluzadə 4 yanvar 1932-ci ildə vəfat edib. Fəxri Xiyabanda dəfn edilib.

Videoçarxı aşağıdakı keçiddən izləyə bilərsiniz:

https://www.instagram.com/tv/CLGZmDxhezd/?igshid=93t6c0vx86il