Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü və təşkilatçılığı ilə Kokand Dövlət Universiteti ilə birlikdə Kokand şəhər Dəmiryolçular sarayında görkəmli bəstəkarımız Üzeyir Hacıbəylinin 140 illiyi ilə əlaqədar konsert təşkil edilib.

Bu barədə AZƏRTAC-a Mərkəzdən məlumat verilib.

Bildirilib ki, tədbirdə çıxış edən Özbəkistandakı Heydər Əliyev adına Azərbaycan Mədəniyyət Mərkəzinin direktoru Akif Marifli zəngin tarixə malik olan Azərbaycan mədəniyyətindən söz açıb.

Kokand Dövlət Universitetinin prorektoru Əhmədcan Xusanov Azərbaycan və özbək xalqları arasında mədəniyyət, ələlxüsus da musiqi sahəsində böyük oxşarlıq olduğunu və bunun da ortaq tarixi köklərə dayandığını qeyd edib.

Konsert proqramında Azərbaycan Mədəniyyət Mərkəzinin “Azərbaycan” rəqs qrupu, Kokand Dövlət Universitetinin rəqs ansamblı tərəfindən milli rəqslər nümayiş olunub. Mədəniyyət Mərkəzinin gənclərdən ibarət teatr truppası isə dahi bəstəkarın “Arşın mal alan” operetta-tamaşasını səhnələşdirib.