İyunun 23-də Bakı Şəhər Mədəniyyət Baş İdarəsinin təşkilatçılığı ilə Yasamal rayon Heydər Əliyev Mərkəzində “Konstitusiya və Suverenlik İli” çərçivəsində “Şuşa, sən azadsan!” filmi nümayiş olunub.

Film nümayişində Bakı Hərbi Kollecinin zabit və kursantları iştirak ediblər.

İlk öncə Vətən torpaqlarının azadlığı uğrunda canlarını fəda edən qəhraman şəhidlərin əziz xatirəsi bir dəqiqəlik sükutla yad edilib.

Tədbirdə 2020-ci il noyabrın 8-də müzəffər Ordumuzun Şuşa şəhərini işğaldan azad edərək şanlı tarix yazmasından danışılıb.

Bildirilib ki, qəhrəman əsgər və zabitlərimizin şücaəti nəticəsində xalqımızın qüdrətinin və milli qürurumuzun təntənəsinə çevrilən möhtəşəm qələbə, Azərbaycan Respublikasının Prezidenti cənab İlham Əliyevin Sərəncamı ilə əbədiləşdirilib.

Sonra “Şuşa, sən azadsan!” filmi nümayiş olunub.

Qeyd edək ki, 2021-ci ildə rejissor Cavidan Şərifov tərəfindən ekranlaşdırılan, Bakı Media Mərkəzi və “Salnaməfilm” studiyasının birgə istehsalı olan filmdə müasir hərb tarixinin ən parlaq səhifələrindən biri olan “Şuşa əməliyyatı”nın diqqətçəkən məqamları təqdim olunub.

Filmdə “Şuşa əməliyyatı”nı həyata keçirən cəsur əsgər və zabitlərimizin müsahibələri, Şuşanı işğaldan azad edən qəhrəman xüsusi təyinatlılarımızın keçdiyi döyüş yolu, əməliyyat zamanı çəkilmiş eksklüziv kadrlar yer alıb.