Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin birgə təşkilatçılığı ilə reallaşan “Uşaq İncəsənət Festivalı 2025” layihəsinin akademik piano ifaçılığı nominasiyası üzrə final mərhələsi keçirilib.

AZƏRTAC xəbər verir ki, Beynəlxalq Muğam Mərkəzində təşkil olunan final mərhələsində regionlardan 2-ci seçim turunu uğurla keçmiş 6–17 yaşarası istedadlı uşaqlar iştirak ediblər. Festivalda iştirakçılar peşəkar və həvəskar kateqoriyalar üzrə bacarıqlarını nümayiş etdiriblər.

Münsiflər heyətinin üzvü, Əməkdar mədəniyyət işçisi Tamilla Məmmədova jurnalistlərə açıqlamasında festival barədə məlumat verib. Onun sözlərinə görə, festival artıq 9 gündür davam edir və hər gün 40-a yaxın iştirakçı çıxış edir. “Zəif, orta və yüksək səviyyəli şagirdlərin ifalarını dinlədik. Bu festivalın əsas məqsədi istedadlı uşaqları üzə çıxarmaq, onların yaradıcılığını təşviq etmək, milli mədəniyyətə marağı artırmaq və zəngin mədəni irsimizi gənc nəslə ötürməkdir. Festival uşaqların müxtəlif incəsənət sahələrində öz istedadlarını nümayiş və inkişaf etdirdiyi mühüm yaradıcı platformadır. Qaliblərin adları festivalın yekun mərhələsində elan olunacaq”,- deyə T.Məmmədova əlavə edib.

Final mərhələsində iştirak edən 2 nömrəli Uşaq Musiqi Məktəbinin şagirdi Leyla Səmədova təəssüratlarını bölüşərək deyib: “Mən ifa edəndə münsiflər heyətinin maraqla qulaq asdığını gördüm. Bizim üçün elə şərait yaradıblar ki, səhnədə həyəcan hiss etməyək və musiqini sevə-sevə ifa edək. George Gerşvinin “Summertime” əsərini səsləndirdim. Ümid edirəm ki, nəticəm yaxşı olacaq”.

Layihə istedadlı uşaqların yaradıcılıq potensialını inkişaf etdirmək, onların sənətə marağını artırmaq və milli musiqi ənənələrini yaşatmaq məqsədi daşıyır.