ХХ Bakı Caz Festivalı ərəfəsində Azərbaycan Dövlət Akademik Musiqili Teatrında Azərbaycanın caz ulduzlarının iştirakı ilə “Çikaqo” müziklinin premyerasına həsr olunmuş mətbuat konfransı keçirilib.

AZƏRTAC xəbər verir ki, mətbuat konfransında Bakı Caz Festivalının direktoru Leyla Əfəndiyeva, layihənin direktoru və prodüseri Əziz Əzizov, baş rolların ifaçıları Orxan Ağayev, Diana Hacıyeva, Dilarə Kazımova və Ülviyyə Rəhimova iştirak ediblər.

Görüşdə təşkilatçılar festivalın proqramı barədə məlumat verib, premyeraya hazırlıq prosesi barədə ətraflı bəhs ediblər, eləcə də media nümayəndələrinin suallarını cavablandırıblar.

Rejissor Ə.Əzizovun sözlərinə görə, quruluş üçün qeyri-adi həllər tapılıb, onların sayəsində Azərbaycan müzikli digər tamaşalardan fərqlənəcək. O, həmçinin layihənin xaricdə nümayiş olunmaq üçün böyük potensiala malik olduğunu qeyd edib.

Müziklin artistləri bildiriblər ki, bu layihədə iştirak onlar üçün həm çox böyük məsuliyyət, həm də böyük sevincdir.

Bakı Caz Festivalının direktoru L.Əfəndiyeva bəhs edib ki, müziklin anonsu tamaşaçılarda böyük maraq yaratdığından bütün biletlər satılıb. Buna baxmayaraq, təşkilatçılara tamaşada iştirak etmək üçün müraciətlər daxil olmaqda davam edir.

Qeyd edək ki, müziklin premyerası oktyabrın 29-da Azərbaycan Dövlət Akademik Musiqili Teatrında baş tutacaq.

Bakı Caz Festivalı-2025 24-31 oktyabr tarixlərində paytaxtda keçiriləcək. Bu il festivalın 20 illiyi tamam olur. 2005-ci ildə görkəmli saksofonçu və bəstəkar Rain Sultanov tərəfindən təsis edilən Bakı Caz Festivalı payızın ən parlaq və gözlənilən tədbirlərindən biri olacaq.

Səkkiz gün ərzində Bakıda dünyanın ən yaxşı caz musiqiçiləri çıxış edəcəklər. Festivalın açıq məkanlardan tutmuş kamera salonlarına qədər olan meydançalarında konsertlər, sərgilər, cem-sessiyalar, film nümayişləri, ustad dərsləri və seminarlar keçiriləcək.