Mayın 14-də Bakı Şəhər Mədəniyyət Baş İdarəsinin təşkilatçılığı ilə Qaradağ rayon Heydər Əliyev Mərkəzində "Hadrut, sən azadsan" filmi nümayiş olunub.

Filmin nümayişində 197 nömrəli tam orta məktəbin şagirdləri iştirak ediblər.

İlk öncə məktəblilər Ulu Öndər Heydər Əliyevin mənalı ömür yolu, dövlətçilik idealları və xalqı qarşısındakı misilsiz xidmətlərinin əks olunduğu ekspozisiya zalı ilə tanış olublar. Şagirdlər görkəmli siyasi xadimin həyat və fəaliyyətinə dair zəngin materiallarla tanış olaraq, onun Azərbaycanın müstəqilliyi və inkişafı naminə göstərdiyi tarixi xidmətlər barədə ətraflı məlumat öyrəniblər.

Daha sonra Vətən müharibəsinə həsr olunmuş "Hadrut, sən azadsan!" sənədli filmi haqqında məlumat verilib. Bildirilib  ki, film 44 günlük Vətən müharibəsinin gedişində strateji əhəmiyyətə malik Hadrut qəsəbəsinin düşməndən azad olunması uğrunda gedən döyüşlərə həsr olunub. Filmdə əsgər və zabitlərimizin şücaəti, onların qəhrəmanlıq dolu döyüş yolu və azadlıq uğrunda göstərdikləri fədakarlıq real kadrlar və müsahibələr vasitəsilə tamaşaçılara təqdim olunur. Eyni zamanda filmdə Hadrutun tarixi, coğrafiyası və mədəni irsi barədə də məlumatlar verilir.

Qeyd edək ki, film şagirdlərdə dərin vətənpərvərlik hissi oyatmaqla yanaşı, onlara tarixi həqiqətləri daha yaxından öyrənmək imkanı yaradıb.