İstanbulda Cəfər Cabbarlı adına Türkiyə-Azərbaycan Teatrı tərəfindən Xalq şairi Bəxtiyar Vahabzadənin əsərləri əsasında hazırlanan “Yağışdan sonra” ikipərdəli tamaşanın premyerası olub.

AZƏRTAC xəbər verir ki, tamaşa Azərbaycan Diasporuna Dəstək Fondunun dəstəyi ilə uzun illər Türkiyədə Azərbaycan mədəniyyətini tanıdan “Xarıbülbül” Azərbaycan Mədəniyyət Birliyi tərəfindən Bəxtiyar Vahabzadənin 100 illik yubileyi münasibətilə ərsəyə gətirilən layihə çərçivəsində səhnələşdirilib.

Tamaşanın premyerasında Türkiyənin hakim Ədalət və İnkişaf Partiyasının (AK Parti) İstanbul rəhbərliyinin Türk Dövlətləri Təşkilatı 1-ci bölgə koordinatoru Emine Ayhan, partiyanın Üsküdar rayon rəhbərliyinin Türk Dövlətləri ilə Əlaqələr üzrə rəhbər şəxsləri, Azərbaycanın İstanbulda fəaliyyət göstərən mədəniyyət xadimləri, Türk Dünyası Qadınları Platformunun nümayəndələri, eləcə də bir çox QHT-lərin rəhbərləri və əməkdaşları iştirak ediblər.

Tədbirin rəsmi hissəsində çıxış edən Emine Ayhan Türkiyə Prezidenti Rəcəb Tayyib Ərdoğan və AK Partinin İstanbul üzrə rəhbərinin müavini, Türk Dövlətləri ilə Əlaqələr üzrə rəhbəri Mehmet Şahinin salamlarını çatdıraraq sənətin və mədəniyyətin Azərbaycan-Türkiyə qardaşlığını daha da qüvvətləndirən ən güclü körpülərdən biri olduğuna inamını ifadə edib.

Azərbaycanın Əməkdar incəsənət xadimi, aktrisa-rejissor Məlahət Abbasova çıxışında teatrın fəaliyyətini yüksək qiymətləndirərək gələcək fəaliyyətlərinə uğurlar diləyib.

Sonra tamaşaya baxış keçirilib.

Minə Bayrakerinin rejissorluğu ilə ərsəyə gələn tamaşanın truppa rəhbəri Bəhram Afsal, musiqi tərtibatçısı, “Xarıbülbül” Azərbaycan Mədəniyyət Dərnəyinin musiqi bölməsinin rəhbəri, müğənni-aktrisa Vüsalə Əsgərova, dekor tərtibatçısı Aylin Axundova, səs tərtibatçısı Hilal Alp, aktyorlar Neda Sözbir, Mehmet Türkbeyler, Vüsalə Əsgərova, Maruf Demirtaş, Jale Çinar, Bülent Altay, İbrahim Domruk, Murat Eren Dikbasan və Şamira Osmanovadır.

Sonda Türk Dünyası Qadınları Platformunun rəhbəri Günay Əliyeva şanlı Zəfərimizin ildönümü münasibətilə xüsusi hazırlanmış “Xarıbülbül” saatını, Türkiyənin Tək Hədəfim Təhsil Dərnəyinin sədri Cem Yıldırım Türk dünyasına göstərdiyi xüsusi xidmətlərinə görə plaketi “Xarıbülbül” Azərbaycan Mədəniyyət Birliyinin və teatrın rəhbəri Kamalə Kamal Cabbarovaya təqdim ediblər.

Xatırladaq ki, Bəxtiyar Vahabzadənin 100 illik yubileyi münasibətilə ərsəyə gətirilən layihənin ilk günü “Axı dünya fırlanır” mövzusunda panel iclas keçirilib, şairə həsr olunmuş “İstiqlal şairi” sənədli filminin premyerası olub, şairin həyat və yaradıcılığını əks etdirən sərgi açılıb.