XƏBƏRLƏR
MƏLUMAT
Xırdalanda fortepiano ixtisası üzrə ustad dərsi
ÜMÜMİ XƏBƏRLƏR
20/10/2025 12:54

Mədəniyyət Nazirliyi Mədəniyyət üzrə Elmi-Metodiki və İxtisasartırma Mərkəzinin (MEMİM) təşkilatçılığı, Mədəniyyət İşçiləri Həmkarlar İttifaqı, Bakı Şəhər Mədəniyyət Baş İdarəsi və Abşeron-Xızı Regional Mədəniyyət İdarəsinin dəstəyi ilə silsilə ustad dərsləri keçirilib.

8-18 oktyabr tarixlərini əhatə edən və Bakı Şəhər Mədəniyyət Baş İdarəsi ilə Abşeron-Xızı Regional Mədəniyyət İdarəsinin tabeliyindəki musiqi və incəsənət məktəblərinin müəllim və şagirdləri üçün nəzərdə tutulan layihə dahi bəstəkar Üzeyir Hacıbəylinin 140 illiyinə həsr olunub.

Layihə çərçivəsində oktyabrın 17-də Qara Qarayev adına Mərkəzi İncəsənət Məktəbinin direktoru sənətşünaslıq üzrə fəlsəfə doktoru, pianoçu, professor Könül Hüseynovanın iştirakı ilə Abşeron rayon Xırdalan şəhər onbirillik musiqi məktəbində fortepiano ixtisası üzrə ustad dərsi keçirilib. Sözügedən məktəblə yanaşı, regional idarənin tabeliyindəki bir sıra təhsil ocaqlarının müəllim və şagirdləri də ustad dərsində fəal iştirak ediblər.

Dərsin əvvəlində Abşeron-Xızı Regional Mədəniyyət İdarəsi Mədəniyyət müəssisələri ilə iş sektorunun müdiri Zaur Cəfərov, MEMİM-in şöbə müdiri sənətşünaslıq üzrə fəlsəfə doktoru, dosent Cəmilə Mirzəyeva və Xırdalan şəhər onbirillik musiqi məktəbinin Fortepiano şöbəsinin müdiri Arzu Manafova çıxış edərək layihənin uşaq və gənclərin inkişafındakı xüsusi əhəmiyyətindən danışıblar.

Daha sonra Sumqayıt şəhər Səid Rüstəmov adına 3 nömrəli, Əhməd Bakıxanov adına 1 nömrəli, Bülbül adına 2 nömrəli uşaq incəsənət, Q.Qarayev adına 1 nömrəli, Fikrət Əmirov adına 5 nömrəli uşaq musiqi məktəbləri, eləcə də Xırdalan şəhər onbirillik musiqi və Ceyranbatan qəsəbə uşaq incəsənət məktəblərinin şagirdləri Azərbaycan və xarici ölkə bəstəkarlarının əsərlərini ifa ediblər.

Könül Hüseynova fortepiano ifaçılığının əsas xüsusiyyətlərindən danışıb, öz tövsiyələrini müəllim və şagirdlərin diqqətinə çatdırıb.

Xatırladaq ki, 8 oktyabr tarixindən başlayan ustad dərsləri tar, kamança, saz, balaban, qanun, xanəndəlik, fortepiano, violin, klarnet, violonçel, vokal və rəqs ixtisaslarını əhatə edib.

Baxış sayı: 59