Prezident Kitabxanasının hazırladığı “Üzeyir Hacıbəyli” adlı layihənin təqdimatı keçirilib.

AZƏRTAC xəbər verir ki, tədbirdə əvvəlcə Dövlət Himni səsləndirilib.

Layihə Prezident İlham Əliyevin “Üzeyir Hacıbəylinin 140 illiyinin qeyd edilməsi haqqında” Sərəncamının icrası çərçivəsində hazırlanıb.

Tədbirdə çıxış edən Prezident Kitabxanasının direktoru, professor Afət Abbasova layihənin Azərbaycan mədəniyyətinin zənginliyini və Üzeyir Hacıbəylinin irsinin əhəmiyyətini geniş auditoriyaya çatdırmaq baxımından böyük önəm daşıdığını vurğulayıb. O bildirib ki, faktlara və tarixi sənədlərə əsaslanan layihə milli mədəniyyətimizin qorunması və təbliği üçün mühüm əhəmiyyətə malikdir, gənc nəsillərin böyük bəstəkarın yaradıcılığı ilə yaxından tanışlığına imkan yaradır.

Professor Afət Abbasova, həmçinin Üzeyir Hacıbəylinin əsərlərinin ermənilər tərəfindən təhrif olunması hallarına toxunaraq, bu kimi halların qarşısının alınması və milli mədəniyyətimizin düzgün təqdim edilməsinin vacibliyini qeyd edib.

Mədəniyyət nazirinin müavini, Xalq artisti Murad Hüseynov bəstəkarın Azərbaycan musiqi tarixindəki əvəzsiz rolundan danışıb. “Azərbaycanda Musiqi Günü məhz Üzeyir Hacıbəylinin adı ilə bağlıdır. Onun 140 illiyi təkcə Bakıda deyil, Azərbaycanın bölgələrində və dünyanın bir çox ölkələrində geniş qeyd olundu. Festival çərçivəsində bu tədbirlər gənc nəsil üçün də böyük əhəmiyyət daşıdı. Mədəniyyət Nazirliyi adından Prezident Kitabxanasına bu layihəyə görə təşəkkür edirik”,- deyə o əlavə edib.

İncəsənət ədəbiyyatı fondu qrupunun rəhbəri Fəridə Namazova layihənin strukturu barədə məlumat verərək qeyd edib ki, “Bəstəkar”, “Operalar”, “Musiqili komediyalar”, “Publisistika”, “E-resurslar”, “Biblioqrafiya” və digər bölmələrdə Üzeyir Hacıbəylinin yaradıcılığı, elmi və ictimai fəaliyyəti, həmçinin onun xatirəsinin əbədiləşdirilməsi ilə bağlı faktlar toplanıb. “Dahi bəstəkar, Şərqdə ilk operanın müəllifi, görkəmli musiqişünas-alim, pedaqoq, publisist, dramaturq və ictimai xadim olan Üzeyir Hacıbəylinin çoxşaxəli fəaliyyəti və zəngin irsi layihədə geniş şəkildə təqdim olunub. Azərbaycan, ingilis və rus dillərində hazırlanan layihə 12 bölmə və 23 altbölmədən ibarətdir”.

Tədbirdə Azərbaycan Bəstəkarlar İttifaqının sədri, Xalq artisti Firəngiz Əlizadə, Ü.Hacıbəyli adına Bakı Musiqi Akademiyasının rektoru, Xalq artisti Fərhad Bədəlbəyli, Beynəlxalq Muğam Mərkəzinin direktoru, Əməkdar artist Sahib Paşazadə, Niyazi adına Azərbaycan Dövlət Simfonik Orkestrinin baş dirijoru, Xalq artisti Yalçın Adıgözəlov, Bakı Musiqi Akademiyasının professoru, Xalq artisti Ülviyyə Vəliyeva-Hacıbəyli çıxış edərək layihənin milli-mədəni irsimizin qorunması və təbliğində mühüm rol oynadığını bildiriblər.

Tədbirin bədii hissəsində Xalq artistləri Fidan Hacıyeva, Nəzakət Teymurova, eləcə də Bakı Musiqi Akademiyasının tələbələri Hidayət Sadiqbəyli, Aysun Mahmudzadə və Azərbaycan Dövlət İqtisad Universitetinin tələbəsi Yusif Cəfərbəyli çıxış ediblər. Həmçinin Cahangir Cahangirov adına xorun və Sumqayıt şəhəri Bülbül adına 2 nömrəli Uşaq İncəsənət Məktəbinin 8-ci sinif şagirdi Nuray Şahsuvarlının ifaları da təqdim olunub.