“Çikaqo” kult müziklinin premyerası oktyabrın 29-da Azərbaycan Dövlət Akademik Musiqili Teatrında reallaşıb. Tamaşada rolları Azərbaycan caz ulduzları ifa ediblər.

Müzikl iyirminci yubiley festivalı üçün xüsusi olaraq hazırlanıb və Bakı tamaşaçıları üçün uyğunlaşdırılıb. Layihənin rejissoru Əziz Əzizovdur, baş rolları isə Orxan Ağayev (Billi Flin), Diana Hacıyeva (Roksi Hart), Dilarə Kazımova (Velma Kelli) və Ülviyyə Rəhimova (“Mama” Morton) ifa ediblər.

AZƏRTAC-ın müxbiri ilə söhbətdə Ə.Əzizov premyeradan əvvəl özünü əla hiss etdiyini və teatr zalında anşlaqın gözləniləcəyindən şad olduğunu bildirib.

“Ümid edirəm ki, tamaşadan sonra tamaşaçılar da özlərini əla hiss edəcəklər. Əlbəttə ki, anşlaq – çox xoşdur! Biz buna şadıq və həyəcanlıyıq. Lakin istənilən sənətçi səhnəyə çıxanda, zalın dolu olub-olmamasından asılı olmayaraq, bir qədər həyəcan hiss etməlidir. Axı səhnədə xaltura yolverilməzdir. Əlbəttə ki, tamaşamızı təkrar-təkrar nümayiş etdirmək istərdik. Ümid edək ki, buna tezliklə nail ola biləcəyik!” - deyə rejissor qeyd edib.

“Çikaqo” 1920-ci illərdə baş verən və şöhrət uğrunda mübarizə aparan iki rəqib qatil barədə hekayə edən ən məşhur və uzunömürlü Brodvey müzikllərindən biridir. Con Kander və Fred Ebb tərəfindən yazılmış müzikl, əsl cinayətlərdən ilhamlanan 1926-cı ildə yazılmış eyniadlı pyes əsasında çəkilib. O, caz musiqisi, satira və Bob Foss üslubunda heyrətamiz xoreoqrafiyanın qarışığı ilə tanınır.

Həmin axşam festival çərçivəsində Entso Favata (İtaliya), Balint Gyemant Trio (Macarıstan) və Antonio Lizana Trio (İspaniya) çıxış etdilər.

Xatırladaq ki, “Вaku Jazz Festival-2025” oktyabrın 31-dək davam edəcək. Səkkiz gün ərzində Bakıda dünyanın ən yaxşı caz musiqiçiləri çıxış edəcəklər. Festivalın açıq məkanlardan tutmuş kamera salonlarına qədər olan meydançalarında konsertlər, sərgilər, cem-sessiyalar, film nümayişləri, ustad dərsləri, seminarlar və tanınmış musiqi bloqçuları ilə görüşlər keçiriləcək.