Paxlavanın forması azərbaycanlı təfəkkürü ilə çox sıx bağlıdır. Azərbaycan xanımları özündən asılı olmayaraq xingalı, kükünü, plovun qazmağını romb şəklində kəsirlər. Xalçalarda rombşəkilli ornamentlər toxuyurlar, məhz paxlava formalı zinət əşyaları (sırğa, üzük) xoşlayırlar. Rombun gizli mənası inkişafla, yaranışla bağlıdır və torpağın rəmzidir. Novruz şirniyyatı - Paxlava da məhz buna görə ilaxır çərşənbələrdə süfrələri bəzəyir. Paxlavanın ortasına qoyulan badam, qoz, fındıq isə torpağın mərkəz nöqtəsi və təbərrik mənasını daşıyır, eyni təsvirin müxtəlif şəkildəyişmələrini biz dekorativ-tətbiqi sənət nümunələrində də görürük. Bu isə ailəni, ocağı hifz etmək, yaman gözdən, mənfi auradan qorumaq məqsədi daşıyır. Digər tərəfdən paxlava oyanmanı, sərt qış yuxusunda yaşamağa açılan gözü ifadə edir.

Lazım olan ərzaqlar:

3 yumurta

400 qr kərə yağı

100 qr xama

yarım çay qaşığı maya

süd

İçlik üçün:

1 kq qoz

1 kq şəkər tozu

döyülmüş hil – yarım çay qaşığı

Layları yağlamaq və üzərinə tökmək üçün 400 qr ərinmiş yağ.

Şərbət üçün: 300 qr bal və yarım stəkan su

Üzəri üçün 1 ədəd yumurta və bəzək üçün qoz, fındıq və ya badam ləpəsi.

Adətən içlik əvvəlcədən hazırlanır. Qoz sobada bir az qovrulub qabığı təmizlənir. Sonra ləpə çəkəndə üyüdülür, üzərinə şəkər tozu və döyülmüş hil əlavə olunub qarışdırılır.

Xəmir üçün un, yumurta, xama, maya qarışdırılıb üzərinə yağ az-az əlavə olunub hamısı birlikdə qarışdırılır, sonra süd tədricən əlavə olunaraq xəmir yoğurulur. Xəmir nə çox yumşaq, nə də çox bərk olmalıdır. 1 saat isti yerdə xəmir dinləndirilir.

Xəmir 12 kündəyə ayrılır, kündələrdən ikisi böyük olmalıdır, ən alt və ən üst qat üçün.

Hər kündəni qabın ölçüsünə uyğun yayırıq.

Tavanı yağlanır, alt qat tavaya qoyulur, üzəri yaxşı yağlanır.

Yağladıqdan sonra içlikdən hər tərəfinə səpilib əl ilə yayılır.

Bütün qatlar eyni qayda ilə hazırlanıb, ən üst qat qoyulduqdan sonra romb şəkilli kəsilir, üzərinə yumurta çəkilir.

Paxlavaların ortasına zövqə görə hər hansı ləpə düzülür. Kənarda 30-40 dəqiqə saxlanılır.

200 dərəcəli sobada 3-4 dəqiqə bişirilir. Sonra sobadan çıxarıb üzərinə ərinmiş yağ töküb yenidən sobaya qoyuruq və üzəri qızarana qədər bişiririk.

Paxlava bişdikdən sonra üzərinə su ilə həll olunmuş bal tökürük və kənara qoyub paxlavaların şərbəti özünə tam çəkməsini gözləyirik.

Nuş olsun!