Bakı Şəhər Mədəniyyət Baş İdarəsi Xəzər rayon Mərkəzləşdirilmiş Kitabxana Sisteminin 7 nömrəli filialı dünya musiqi xəzinəsinə daxil olmuş, milli və bəşəri dəyərə malik “Koroğlu”  operası haqqında məlumat təqdim edib.

“Koroğlu” operası Üzeyir Hacıbəyli yaradıcılığının, yüksək zirvəsidir. Şedevr sayılan bu əsərdə bəstəkar Azərbaycan xalqının qüdrətini, qürurunu, igidliyini və qalibiyyət əzmini musiqi vasitəsilə ifadə edib ki, həmin mövzu bu gün də çox müasir və aktualdır. “Koroğlu” operası ilk dəfə 1937-ci ildə görkəmli Azərbaycan rejissoru İsmayıl Hidayətzadə tərəfindən Azərbaycan Dövlət Opera və Balet Teatrının səhnəsində tamaşaya qoyulub. Dekorasiyalar rəssam Rüstəm Mustafayevə məxsus idi. İlk tamaşaya Üzeyir Hacıbəyli özü dirijorluq edib.

Koroğlu rolunun ilk ifaçısı görkəmli müğənni Bülbül olub. İlk tamaşada, həmçinin, G.İsgəndərova - Nigar, M.Bağırov - Həsən xan, Q.İsgəndərov - Təlxək, H.Hüseynov - Həmzə bəy, Q.Almaszadə - rəqqasə rollarında çıxış ediblər. Opera yarandığı gündən az bir zaman ərzində Azərbaycan xalqının məhəbbətini qazanıb, Azərbaycan incəsənətinin inkişafında yeni bir mərhələ olub. 

“Koroğlu” operasının əsasını xalqın azadlıq mübarizəsinə, XVI – XVII əsrlərdə kəndli hərəkatına həsr olunmuş eyniadlı aşıq dastanının motivləri təşkil edir. “Koroğlu” epik operadır. Burada monumental, kütləvi xor və rəqs səhnələrində kəndlilərin surəti öz geniş əksini tapır. Ü.Hacıbəyli məntiqi ardıcıllıqla xanların zülmündən cana doyan xalqın qəzəbinin coşmasını, onun psixologiyasının və əhval-ruhiyyəsinin dəyişməsini, qorxu altında əzilən bir kütlədən Çənlibel qalasında azad həyatı tərənnüm edən mübariz qüvvəyə çevrilməsini göstərir. “Koroğlu” operasının uvertürası əsərin əsas ideyasını əks etdirən simfonik lövhədir. Burada xalq obrazını səciyyələndirən ən parlaq mövzular cəmlənib. “Koroğlu” uvertürası bu gün Azərbaycan xalqı üçün azadlıq himninə çevrilib. 

Videoçarxı aşağıdakı keçiddən izləyə bilərsiniz: