Pablo Pikasso 25 oktyabr 1881-ci ildə Malaqada dünyaya gəlib. Birinci adı Pablo, digər adı isə Ruiz Pikasso olub. Bir müddət sonra atasının soyadı Don Xose Ruiz yerinə anasının soyadı Pikassonu istifadə etməyə başlayıb. Atası yerli rəsm məktəbində müəllim olub. Atası oğlunda olan bacarığı görüb onu rəssam olaraq yetişdirməyə başlayıb.

Pikassonun 2 kiçik bacısı olub: Lola və Konçita. Konçita 8 yaşında difteriyadan vəfat edib. Həmin vaxt 14 yaşında olan Pikassonun bacısının ölümündən nə qədər təsirləndiyini bilmirik. Ancaq bundan sonra xəstə insanların yanında durmağa dözə bilmədiyi məlumdur.

Pikasso ilk akademik əsərini 15 yaşında çəkib. Əsər Milli İncəsənət sərgisində yüksək dəyərləndirilib və Malaqa şəhərindəki bir müsabiqədə qızıl medal qazanıb. Rəsmdə xəstə qadının nəbzini tutan həkim Pikassonun atasını xatırladır.

Pikasso dostu Kasegemas ilə Parisə köçüb. Kasegemasın intiharı Pikassonu dərindən sarsıdıb və bu rəsmlərində də əks olunub. 1901-ci ildən 1904-cü ilə qədər mavi rəngin hakim olduğu şəkillər çəkib. Bu dövr onun yaradıcılığında “Mavi dövr” adlandırılır. Əsərdəki fiqurların kim olduğunu və niyə sahildə toplaşdıqlarını bilməsək də, bu rəsmin çəkiliş tərzi və mavinin hakim olması Pikassonun rəsmi dostunun ölümündən sonra çəkdiyini göstərir.

Pikasso yaradıcılığının 1904-cü ildən 1905-ə qədərki dövrü “Çəhrayı dövr” və ya “Sirk dövrü” adlandırılır. Bu dövrdə mavi rəng çəhrayıya çevrilib və klounların, sirk işçilərinin, akrobatların şəkillərini çəkməyə başlayıb. Bu əsərdə olan obrazlara insanların gözündəki əyləndirici rolları ilə ziddiyyət təşkil edən ciddi görüntü hakimdir. Bu dövrdə çəkdiyi digər rəsmlərdə olduğu kimi qrupun nəyi təmsil etdiyini bilmirik, amma klounun əlini tutan və əlində bir səbət gül olan kiçik qızın varlığı diqqəti cəlb edir. Təsvir olunan qız Pikassonun itirdiyi bacısı ilə təxminən eyni yaşda olmalıdır.

Bəziləri kök klounun Pikassonun dostlarından Apollinairenin, oturan qadının isə o dövrdə sevgilisi Fernanda Olivyenin təsviri olduğunu irəli sürür.

Pikasso 1906-cı ildən etibarən incəsənət aləmində diqqəti cəlb etməyə başlayıb. 1907-ci ilin yaz və yay ayları boyunca qərb rəsm sənətinə, hardasa, 500 ildir hakim olan bədii ənənəni yıxacağını düşündüyü bir əsər üzərində çalışıb. Bu əsərə əvvəlcə Le Bordel adını verib, amma əsər sonradan “Les Demoiselles Avignon” (Avinyonlu qızlar) adıyla tanınıb.

Pikasso XX əsrdə yaranan kubizm cərəyanının banisi, bu əsər isə onun başlanğıcıdır. Pikasso ən böyük əsəri üçün saysız-hesabsız eskizlər çəkib. Əsərin ilkin halında  dənizçi və tələbəylə birlikdə qadın görünüb. Pikasso rəsm üzərində işlədikcə rəsmin görünüşü də dəyişməyə başlayıb. Tələbə və dənizçinin yerini daha çox qadın əvəz etməyə başlayıb. Əsərdə kəskin şəkildə arxadan görünən fiqurlar, künclü və uyğunsuz kompozisiya diqqəti cəlb edib. Ənənəvi rəsmlərdən çox fərqli olduğu olduqca barizdir.

Pikasso 1916-cı ildə rus generalın qızı Olqa Xoxlova ilə evlənir. 1921-ci ildə oğlu Paulo dünyaya gəlir.

1927-ci ildə Mariya-Tereza Valter adlı 17 yaşlı qız ilə tanış olub. Pikasso evli olduğundan aralarındakı münasibət gizli davam edib. 1935-ci ildə həyat yoldaşı Olqadan ayrılıb. Mariya ilə münasibətindən 1935-ci ildə Maya Vidmayer adını verdiyi bir qızı olub.

1936-cı ildə bir dostu vasitəsilə Dora Maar ilə tanış olub. Pikasso portretlərinin birini Mariya Terezanın şəklini çəkdiyi zamanlarda çəkib.

1936-cı ildə İspaniyada vətəndaş müharibəsi baş verib. Pikasso hadisələri eşidəndə adını “Gernika” qoyduğu əsər üzərində çalışıb və deyib: “İspaniyadakı müharibə xalqa və azadlığa qarşı müharibədir. Bir rəssam kimi cəhalət və incəsənətin ölümünə qarşı mübarizə apardım. Hazırda üzərində işlədiyim və Gernika adını verəcəyim bu əsərdə İspaniyanı səfalət və ölüm okeanına aparan hərbi sinfə qarşı hiss etdiyim qəzəbi göstərməyə çalışıram”.

Pikasso 1945-ci ildə özündən 40 yaş kiçik Fransua Gilot (Françoise Gilot) ilə münasibət qurmağa başlayıb. Cütlüyün 1957-ci ildə Klod adlı oğlu, 1949-cu ildə isə Paloma adlı qızı dünyaya gəlib. Münasibətləri 1953-cü ilə qədər davam edib.

1953-cü ildə Jakelin Rok (Jacqueline Roque) ilə tanış olub və 1961-ci ildə evləniblər.

“Mavi dövr”də çəkdiyi rəsmlərdən biri 1967-ci ildə sağ ikən bir rəssamın əsərinə verilən ən yüksək qiymətə, yəni 532.000 dollara satılıb.

Pablo Pikasso 8 aprel 1973-cü ildə 91 yaşında vəfat edib.