Fevralın 24-də Milli Kitabxanada Mədəniyyət Nazirliyinin tabeliyində olan kitabxanaların iştirakı ilə Xocalı soyqırımının 30-cu ildönümünə həsr olunmuş “Xocalı soyqırımı – 30” adlı videokonfrans və Səkinə Turabqızının “Xocalı ağrısı: (tarixi esselər)” adlı kitabının onlayn təqdimatı keçirilib.

AZƏRTAC xəbər verir ki, tədbiri Milli Kitabxananın direktoru, professor Kərim Tahirov açaraq konfrans iştirakçılarını salamlayıb.

Daha sonra Xocalı faciəsi şəhidlərinin xatirəsi bir dəqiqəlik sükutla yad edilib.

Bildirilib ki, Xocalı soyqırımı XX əsrin ən böyük faciəsi, bəşəriyyətə, insanlığa qarşı törədilmiş qətliamdır. Azərbaycan xalqına qarşı zaman-zaman belə qətliamlar törədilib. XX əsrin sonunda, sivil bir dünya düzənində belə tükürpədici qətliamın, bəşəriyyətin qanını donduran soyqırımın baş verməsi ağlasığmazdır.

Bu gün bu faciə haqqında danışmaq çox çətindir.

Vurğulanıb ki, Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə müzəffər Azərbaycan Ordusu 44 günlük müharibə nəticəsində torpaqlarımız düşmən tapdağından azad olunub və xocalıların qisası alınıb.

Xocalı faciəsi haqqında çoxsaylı kitabların işıq üzü gördüyünü söyləyən natiq Səkinə Turabqızının “Xocalı ağrısı: (tarixi esselər)” kitabının da belə əhəmiyyətli nəşrlərdən olduğunu vurğulayıb.

Kitab haqqında məlumat verən Milli Kitabxananın direktoru qeyd edib ki, Xocalı faciəsi haqqında çoxsaylı nəşrlərin olmasına baxmayaraq bu kitab fərqlidir. Belə ki, kitabda giriş hissədə Xocalı, onun tarixi haqqında məlumatlar verilir, eyni zamanda müəllif kitabda verilən ayrı-ayrı esselərdə Xocalı soyqırımı haqqında öz fikirlərini qeyd edir. Müəllifin tarixi faktlara əsaslanaraq xalqımızın böyük faciəsi – Xocalı soyqırımı haqqında tarixi esseləri, publisistik düşüncələri bədii sözün aynasında təqdim olunub.

Son olaraq professor Kərim Tahirov belə nəşrlərin belə nəşrlərin xarici dillərə tərcümə olunması məsələsinin əhəmiyyətini qeyd edib.

Milli Kitabxananın direktor müavini Ədibə İsmayılova çıxış edərək bildirib ki, Xocalı faciəsi bizim XX əsr tariximizin ən fəlakətli, ən dəhşətli, ən acınacaqlı səhifəsidir. Azərbaycan xalqı Xocalı faciəsini heç vaxt unutmur və unutmayacaqdır. Milli Kitabxana hər ildönümü ərəfəsində əyani tədbirlər, geniş kitab sərgiləri, eləcə də kitab təqdimatları keçirir. Bu il də Milli Kitabxana olaraq Xocalı soyqırımının otuzuncu ildönümü haqqında Azərbaycan Respublikası Prezidentinin Sərəncamı və Mədəniyyət Nazirliyinin tədbirlər planına uyğun olaraq bir sıra tədbirlər həyata keçirilib. O, konfrans iştirakçılarına Milli Kitabxananın əməkdaşları tərəfindən hazırlanan Xocalı soyqırımımın 30 illiyinə həsr edilmiş təqdirlər, sərgilər, elektron məlumat bazası haqqında məlumat verib.

Tədbirdə Ağcabədi MKS-nin direktoru Məhəbbət Əliyeva, F.Köçərli adına Respublika Uşaq Kitabxanasının direktoru Şəhla Qəmbərova, eləcə də Sumqayıt MKS-nin direktoru Yeganə Əhmədova çıxış edərək Xocalı soyqırımına həsr edilmiş tədbirlərdən, eləcə də bu istiqamətdə Milli Kitabxananın hazırladığı elektron bazaların və pandemiya zamanı oxuculara, bölgələrdəki kitabxanalara göstərdiyi xidmət işinin əhəmiyyətindən danışıblar.

Tədbirin sonunda “Xocalı ağrısı: (tarixi esselər)” kitabının müəllifi Azərbaycan Yazıçılar Birliyinin və Jurnalistlər Birliyinin üzvü, “Qızıl qələm” media mükafatı laureatı Səkinə Turabqızı çıxış edərək ilk öncə belə tədbiri təşkil etdiyinə görə Milli Kitabxanaya, direktor Kərim Tahirova öz təşəkkürünü bildirib.

O bildirib ki, müəllifi olduğu “Xocalı ağrısı” kitabını qələmə alarkən tarixi faktlara əsaslanıb. Qeyd edib ki, “Xocalı ağrısı” kitabını qələmə alarkən çoxsaylı Xocalı şahidləri ilə görüşüb. Bu görüşlər zamanı daim onların necə erməni vandalizminə düçar olduqlarının, onlara qarşı ermənilərin necə vəhşicəsinə soyqırımı etdiklərinin bir daha şahidi olduğunu qeyd edib.