Rzaquluzadə Mikayıl Manaf oğlu 17 mart 1905-ci ildə Bakıda doğulub. Yeni üsullu 5 nömrəli "Rus-müsəlman" məktəbində, həm də xüsusi müəllim yanında hazırlaşıb. Bakı ticarət məktəbinə, sonradan isə ekstern imtahan verərək Ali Pedaqoji İnstitutun tarix fakültəsinə daxil olub.

 

İnstitutu bitirdikdən sonra Gəncə pedaqoji texnikumunda, həm də fəhlə fakültəsində ədəbiyyat və pedaqogika-psixologiya müəllimi işləyib. Moskvada İkinci Dövlət Universiteti yanında olan Pedaqoji Psixologiya-Pedologiya Elmi-Tədqiqat İnstitutunun aspiranturasında təhsil alıb.

 

Azərbaycan Dövlət Elmi-Tədqiqat Pedaqogika İnstitutunda uşaq ədəbiyyatı sahəsində elmi işçi, "Azərnəşr"də tərcüməçi və redaktor olub, "İnqilab və mədəniyyət" jurnalı redaksiyasında məsul katib, "Azərbaycanfilm" kino studiyasında, Xarici Ölkələrlə Mədəni Əlaqələr Cəmiyyətində baş redaktor, "Azərbaycan" jurnalı redaksiyasında baş redaktorun müavini vəzifələrində çalışıb. 20-dən çox şeir və nəsr əsəri toplanmış kitabın, 60 tərcümə kitabının müəllifi olub. 

 

Ədəbi fəaliyyətə 1923-cü ildə "Müəllim" şeiri ilə başlayıb. İlk məqaləsi isə 1926-cı ildə "Maarif işçisi" jurnalında "Cocuq ədəbiyyatında üsul məsələsi" adı ilə dərc olunub. 1945-ci ildən başlayaraq bütün kitablarını uşaq və gənclər üçün nəzərdə tutub. Dünya və keçmiş SSRİ xalqlarının ədəbiyyatından tərcümələr edib. Ədəbiyyat sahəsində xidmətlərinə görə iki medal, üç dəfə Azərbaycan Respublikası Ali Soveti Rəyasət Heyətinin Fəxri fərmanı ilə təltif edilib.