Azərbaycan Respublikasının Xalq artisti Samir Cəfərov 19 noyabr 1976-cı ildə Naxçıvanın, Babək rayonunun Nehrəm kəndində anadan olub. 1993-1997-ci illər ərzində Azərbaycan Dövlət Mədəniyyət və İncəsənət Universitetində Teatr və kino sənəti ixtisası üzrə, 1999-2001-cı illərdə Bakı Musiqi Akademiyasında solo oxuma ixtisası üzrə təhsil alıb. Azərbaycan Dövlət Akademik Opera və Balet Teatrın solistidir.

Ü.Hacıbəylinin “Koroğlu” operasında Koroğlu, Cüzeppe Verdinin “Traviata” operasında Alfred və “Riqoletto”da Hersoq partiyalarını ifa edir.

2001-ci ildə Almatıda keçirilən Vokalçıların Beynəlxalq Müsabiqəsinin laureatı olub (2 yer). 2002-ci ildə Moskva şəhərində “Qalina Vişnevskayanın Opera Mərkəzi”ndə təhsil alıb.

Repertuarında Avropa və Azərbaycan bəstəkarlarının operalarının aparıcı partiyaları, habelə mahnı və romanslar təmsil olunub.

Rusiya, İspaniya və s. ölkələrdə qastrol səfərlərində olub.

Samir Cəfərov 2007-ci ildə “Azərbaycan Respublikasının Əməkdar artisti”, 2012-ci ildə “Xalq artisti” fəxri adlarına layiq görülüb.

30 aprel 2014-cü ildə, 6 may 2015-ci ildə, 6 may 2016-cı ildə, 1 may 2017-ci ildə, 9 may 2018-ci ildə, 10 may 2019-cu ildə, 7 may 2020-ci ildə və 7 may 2021-ci ildə Prezident Mükafatına layiq görülüb.

2017-2018-ci illərdə Gəncə Dövlət Filarmoniyasının direktoru vəzifəsində çalışıb.