Azərbaycanın Xalq artisti, müğənni Bilal Şahşirin oğlu Əliyev 18 noyabr 1959-cu ildə Salyan rayonunun Kürqaraqaşlı kəndində anadan olub.

1982-ci ildə A.Zeynallı adına Musiqi Texnikumunun xanəndəlik fakültəsinə daxil olub, 1986-cı ildə texnikumu müvəffəqiyyətlə bitirib. Azərbaycan Dövlət Mədəniyyət və İncəsənət Universitetini bitirib.

Əmək fəaliyyətinə 1993-cü ildən R.Behbudov adına Azərbaycan Dövlət Mahnı Teatrında vokalçı vəzifəsi ilə başlayıb.

O, Türkiyənin Ankara, İstanbul, Kırıkkale və digər şəhərlərində keçirilən festivallarda, Avstriyanın Vyana şəhərində, Ukraynanın Kiyev şəhərində, Almaniyanın Mayns şəhərində keçirilən "Azərbaycan mədəniyyəti günləri”ndə, Rusiya Federasiyasının bir çox şəhərlərində, o cümlədən Yekaterinburqda Novruz bayramı ilə əlaqədar keçirilən tədbirlərdə,  Almaniyanın yenidən birləşməsinin X ildönümünə həsr olunmuş “EKSPO–2000” sərgisinin rəsmi dəvəti ilə Almaniyada, Azərbaycan Respublikasının Avropa Şurasına qəbul edilməsinin I ildönümü münasibəti ilə Fransanın Strassburq şəhərində keçirilən tədbirlərdə Azərbaycan musiqisini təmsil edib.

Bilal Əliyevə Azərbaycan Respublikası Prezidentinin 2000-ci il 28 oktyabr tarixli Fərmanı ilə Azərbaycan mədəniyyətinin inkişafındakı xidmətlərinə görə "Əməkdar artist", 2009-cu il 02 iyul tarixli Sərəncamı ilə Azərbaycan musiqisinin inkişafındakı xidmətlərinə görə "Azərbaycan Respublikasının Xalq artisti" fəxri adları verilib.