XƏBƏRLƏR
MƏLUMAT
Azərbaycan Mədəniyyət Mərkəzi dilimizin tədrisi ilə bağlı Özbəkistanın Gənclərlə İşlər Agentliyi ilə memorandum imzalayıb
ÜMÜMİ XƏBƏRLƏR
29/11/2023 12:04

Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü ilə Özbəkistan Gənclərlə İşlər Agentliyi arasında Azərbaycan dilinin bu ölkədə kütləvi tədrisi ilə bağlı memorandum imzalanıb.

AZƏRTAC xəbər verir ki, Özbəkistan Gənclərlə İşlər Agentliyi “İbrət fərzəndləri” layihəsinin rəhbəri Rustam Qoriyevin rəhbərlik etdiyi nümayəndə heyəti Özbəkistandakı Heydər Əliyev adına Azərbaycan Mədəniyyət Mərkəzini ziyarət edib.

Qonaqları qəbul edən Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov görüş zamanı Azərbaycan Mədəniyyət Mərkəzinin tarixi, fəaliyyəti və missiyası barədə geniş məlumat verərək Özbəkistanda Azərbaycan mədəniyyətinin, tarixinin, ədəbiyyatının təbliğinə, habelə, Azərbaycan dilinin tədrisinə böyük əhəmiyyət verdiklərini və bu sahədə onlarla əməkdaşlıq etmək istəyən təşkilatlara da dəstək olmaq üçün hazır olduqlarını bildirib.

“İbrət fərzəndləri” layihəsinin rəhbəri Rustam Qoriyev də öz növbəsində Azərbaycan Mədəniyyət Mərkəzinə ziyarətlərindən məmnunluq duyduqlarını və gələcəkdə də bir çox sahələrdə əməkdaşlığa hazır olduqlarını qeyd edib. Özbəkistan Gənclərlə İşlər Agentliyinin “İbrət fərzəndləri” layihəsi haqqında məlumat verən Rustam Qoriyev layihəyə yaxından dəstək və maraq göstərdiklərinə görə Samir Abbasova öz təşəkkürünü bildirib.

Bundan əlavə görüş zamanı Özbəkistandakı Heydər Əliyev adına Azərbaycan Mədəniyyət Mərkəzi ilə Özbəkistan Gənclərlə İşlər Agentliyi arasında həmkarlıq çərçivəsində birgə tədbirlərin, yay-qış düşərgələrinin, ustad dərslərin, sərgi və yarışların, bilik olimpiadalarının, təhsil, mədəniyyət sahəsində layihələrin, ölkələrimizin gənclər siyasətinin dəstəklənməsi və s. bir çox sahədə əməkdaşlıq perspektivləri müzakirə edilib, bir çox məsələlər üzrə razılıqlar əldə olunub və Özbəkistandakı Heydər Əliyev adına Azərbaycan Mədəniyyəti Mərkəzinin təşəbbüsü ilə Özbəkistan Gənclərlə İşlər Agentliyi arasında Azərbaycan dilinin Özbəkistanda kütləvi tədrisi sahəsində memorandum imzalanıb.

Görüş zamanı “İbrat farzandlari” layihəsinin rəhbəri Rustam Qoriyev Azərbaycan-Özbəkistan mədəni, ədəbi əlaqələrinin möhkəmləmndirilməsi sahəsindəki fəaliyyətinə görə Azərbaycan Mədəniyyət Mərkəzi tərəfindən fəxri fərmanla təltif olunub və nümayəndə heyətinə ilkin olaraq Azərbaycan dilinin tədrisi üçün dərs vəsaitləri, lüğət və danışıq kitabları, bədii ədəbiyyatlar hədiyyə edilib.

Məlumat üçün bildirək ki, Özbəkistan Gənclərlə İşlər Agentliyi “İbrət fərzəndləri” layihəsi gənclərin aparıcı əcnəbi dillərə yiyələnməsi yutub kanalında yaradılmış böyük bir platformadır.

2022-ci ildə yaradılan novator layihə sayılan “İbrat farzandlari” layihəsi xarici dilləri pulsuz, sadə və yaradıcı şəkildə öyrətmək məqsədi daşıyır. Layihədə qısa müddət ərzində müxtəlif dillərdə biliklərə yiyələnmək istəyənlər üçün əlverişli şərait yaradılmış və hər dil üzrə yutubda yerləşdirilmiş videolar vasitəsilə xüsusi proqram əsasında tədris olunur.

Qeyd edək ki, Özbəkistanda “İbrat farzandlari” layihəsinə qısa müddət ərzində 410 mindən çox tələbə və gənc qoşulub. Hazırda sözügedən tətbiqdən 354 minə yaxın gənc istifadə edir. Burada tələbələr onlayn və oflayn dərslərə qoşula bilir, eyni zamanda, interaktiv şəkildə dil səviyyələrini daim yoxlaya, biliklərini möhkəmləndirə test və tapşırıqları yerinə yetirə, lüğət ehtiyatlarını da artıra bilirlər. Bu yolla proqram istifadəçinin dil biliklərinin müvafiq səviyyəsində dərslər və testlər tövsiyə edir.

Hazırda layihə çərçivəsində Azərbaycan, Koreya, alman, yapon, ingilis, türk, çin, rus, ispan, fransız, ərəb, fars, urdu, hind, malay, puştu dilləri də daxil olmaqla 25-dən artıq əcnəbi dil tədris olunur.

Qeyd edək ki, Azərbaycan Mədəniyyət Mərkəzi layihəyə dəstək məqsədilə tədris vəsaitləri, lüğətlər, danışıq kitabları, audio-video disklər, dil biliklərini möhkəmləndirmək üçün Azərbaycan dilində olan ədəbiyyatları “İbrat farzandlari” layihəsinə hədiyyə edib, proqram və tədrisin təşkilinə yaxından köməklik göstərməkdədir.

Layihədə Azərbaycan dilini öyrənmək istəyənlər link vasitəsi ilə daxil ola bilərlər.

Baxış sayı: 134