Azərbaycan Musiqi Mədəniyyəti Dövlət Muzeyində Ü.Hacıbəyli adına Bakı Musiqi Akademiyası ilə birgə faşizm zərində qələbənin 80 illiyinə həsr olunmuş konsert keçirilib.

AZƏRTAC xəbər verir ki, konsertdən əvvəl Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova çıxış edərək qələbənin əldə olunmasında Azərbaycan xalqının göstərdiyi şücaətdən danışıb.

Bakı Musiqi Akademiyasının tələbələri II Dünya müharibəsində faşizm üzərində qələbə uğrunda Azərbaycan xalqının ön və arxa cəbhədə göstərdiyi qəhrəmanlıq və şücaəti haqqında məlumatlarla çıxış ediblər.

Konsertdə Bakı Musiqi Akademiyasının professoru, Xalq artisti Ülviyyə Hacıbəyova, Azərbaycan Dövlət Akademik Musiqili Teatrın solisti Yuliya Heydərova, Akademik Opera və Balet Teatrının solisti Ruslan Persanov, Azərbaycan Dövlət Xor Kapellasının solistləri, beynəlxalq müsabiqələr laureatları Kamilla İmanova, Elyar Əliyev, Fərhad Ələkbərov, Tofiq Zeynalov, konsertmeysterlər-Alyona İnyakina, Dilarə Kərimova, Nərmin Günəşli, Bakı Musiqi Akademiyasının məzunu Nərgiz Məmmədova, tələbələri Ayşə Məmmədova, Nigar Novruzovanın və Cavid Babayevin ifalarında Azərbaycan və sovet bəstəkarlarının hərbi-vətənpərvərlik mövzusunda yazılmış əsərlərindən ibarət musiqi proqramı, rəqs nömrələri təqdim olunub.

Konsert zamanı bütün ifalar Azərbaycan Musiqi Mədəniyyəti Dövlət Muzeyinin zəngin kolleksiyaları əsasında hazırlanmış “Azərbaycan musiqiçiləri 1941-1945-ci illər İkinci Dünya müharibəsində” adlı slayd-şou ilə müşayiət olunub.

Konsertin bədii rəhbəri Bakı Musiqi Akademiyasının baş müəllimi, sənətşünaslıq üzrə fəlsəfə doktoru Alyona İnyakinadır.