Mayın 10-da Bakı Şəhər Mədəniyyət Baş İdarəsinin Yasamal rayon Heydər Əliyev Mərkəzində Ağdam rayon 88 nömrəli tam orta məktəbin təşkilatçılığı ilə ümummilli lider Heydər Əliyevin anadan olmasının 99-cu ildönümünə həsr olunmuş “Azərbaycan tarixində doğan günəş” adlı tədbir keçirilib.

Tədbirdə Ağdam rayon İcra Hakimiyyəti başçısının Yasamal rayonu üzrə səlahiyyətli nümayəndəsi Akif Hüseynli,Ağdam rayon təhsil şöbəsinin metodisti Səadət Dadaşova, Ağdam rayon 88 nömrəli tam orta məktəbin direktoru Mətanət Məmmədova, məktəbin müəllim və şagird kollektivi, digər qonaqlar iştirak ediblər.                                                                 

İlk öncə Mərkəzin “Muzey” bölməsində Ulu Öndər Heydər Əliyevin büstü önünə gül dəstələri qoyularaq, əziz xatirəsi yad edilib.

Daha sonra Azərbaycan Respublikasının Dövlət Himni səsləndirilib. Ümummilli lider Heydər Əliyevin əziz xatirəsi bir dəqiqəlik sükutla yad edilib.

Tədbiri giriş sözü ilə Yasamal rayon Heydər Əliyev Mərkəzinin direktoru Naminə Ömərova açaraq Azərbaycan xalqının ümummilli lideri Heydər Əliyevin siyasi fəaliyyəti haqqında məlumat verib.

Məktəb direktoru Mətanət Məmmədova və digər qonaqlar ümummilli lider Heydər Əliyevin Azərbaycanda hüquqi, demokratik və dünyəvi dövlət quruculuğu sahəsindəki misilsiz xidmətlərindən bəhs ediblər.  

Tədbirin bədii hissəsində məktəb şagirdlərinin ifasında Ulu Öndərə həsr olunmuş şeirlər, Güldənə Ağamalıyevanın ifasında -“Ulu öndər”, “Xarıbülbül”, Xor qrupunun ifasında “Heydər baba” mahnısı, “Zəfər marşı”, “Xarıbülbül” rəqsləri ifa olunub.