Bakı Şəhər Mədəniyyət Baş İdarəsi Xəzər rayon Mərkəzləşdirilmiş Kitabxana Sisteminin  2 nömrəli filialı Azərbaycan uşaq ədəbiyyatının parlaq nümayəndəsi Xanımana Əlibəylinin Əsər kitabından "Tülkü və canavar" şeirini səsləndirərək kitabın video-təqdimatını hazırlayıb.

Xanımana Əlibəyli 87 illik ömrünü uşaqlar üçün yazıb-yaratmağa həsr etmiş bir sənətkardır. O, uşaqlar üçün yazılmış yüzlərlə şeirin, onlarla poema və səhnə əsərinin, 30-dan artıq kitabın müəllifidir.

"Aycan" pyesinin uğurlu tamaşası münasibətilə yaradıcı heyətin üzvləri rejissor Ulduz Rəfili, bəstəkar Şəfiqə Axundova və baletmeyster Nailə Nəzirova ilə birlikdə Xanımana da Azərbaycan SSR-nin Dövlət mükafatına layiq görülüb. 1991-ci ildə ona “Əməkdar incəsənət xadimi” adı verilib. 1998-ci ildə Xanımana "İlin qadını" adını alıb. 1999-cu ildə Heydər Əliyev ona Prezident təqaüdü təyin edib, bu münasibətlə xatirə olaraq ona büllur şamdan da bağışlanıb. Xanımananın "Balaca həkim" adlı ilk şeirlər toplusu 1955-ci ildə işıq üzü görüb.

O, "Aman ovçu", "Ağ çəmən", "Ulduzların qucağında", "Bir yay səhəri", "Çoxbilmiş çəpişlər", "Məni günəşə at!", "Meşə həkimi", "Sevimli şəhid babam" və digər qiymətli poemaların müəllifidir. "Dovşanın ad günü" Xanımananın ən populyar poemalarından biridir.

"Balaca həkim" adlı digər bir miniatür poemasında da Xanımananın əsas təsvir və tərənnüm obyekti heyvanlar, onların kukla və oyuncaq variantlarıdır. O, müxtəlif illərdə "Gözəllər gözəli", "Nişanlı quş", "Aycan", "Dovşanın ad günü", "Cunquş", "Kənd həkimi", "Durnalar lələk salır", "Meyvələrin şahı" və s. dram əsərləri yazıb, onların bir çoxu gənclər və kukla teatrlarında göstərilib.

Kitabın video-təqdimatına aşağıdakı keçidlərdən baxa bilərsiniz:

https://youtu.be/8Ze2gWjCjGU

https://www.instagram.com/p/CStk7VzlLmV/?utm_medium=copy_link