Azərbaycanın Xalq artisti, qaboy ustası, bəstəkar və pedaqoq Kamil Cəlilov dünyasını dəyişib. 

Qeyd edək ki, 1938-ci il yanvarın 29-da Buzovnada anadan olan K.Cəlilov qoboy alətini muğam janrına gətirən ilk ifaçıdır. Bəstəkar Fikrət Əmirovun qoboy və fortepiano üçün "Altı pyes"inin ilk ifaçısıdır. O, Qara Qarayev adına Azərbaycan Dövlət Kamera Orkestrinin, Azərbaycan Televiziyası və Radiosunun simfonik orkestrinin solisti olub. Kamil Cəlilov dəfələrlə ölkəmizi onun hüdudlarından kənarda keçirilən müsabiqələrdə uğurla təmsil edərək mükafatlara layiq görülüb.

Kamil müəllim həmçinin Gülarə Əliyevanın rəhbərlik etdiyi “Dan  Ulduzu” instrumental ansamblının solisti olub.

1977-ci ildə Kamil Cəlilovun çaldığı “Çahargah ahəngi” (bəzən o “Muğam” da adlandırılır) kompozisiyası UNESCO tərəfindən Voyaçer qızıl plastinkasına daxil edilib və digər əsərlərlə birlikdə yadplanetliləri Yer planetinin musiqi dünyası ilə tanış etmək məqsədilə kosmosa göndərilib.

"Bayatı Kürd", "Segah”, "Zəminxara", "Bayatı-Şiraz", "Rahab", "Zabul", "Hümayun", "Qarabağ şikəstəsi", "Kəsmə Şikəstə" muğamları Kamil Cəlilovun ifaçılıq sənətinə bəxş etdiyi dəyərli incilərdir. "Rahab", "Yanıq Kərəmi", "Kəsməşikəstə", "Simayi-şəms", "Baş sarıtel”, "Cəlili" və bu kimi musiqi nümunələrini özünün tərzində ifa edərək qoboy alətində Şərq musiqisinin özünəməxsus səslənməsinə nail olub.

Onun ifasında "Apardı sellər Saranı", "Sarı bülbül" və birsıra digər xalq mahnıları çox yanıqlı və kövrək səslənib. Kamil Cəlilovun ifasında Nikolay Rimski-Korsakovun "Çar Soltan haqqında nağıl" operasından "Arının uçuşu", Üzeyir Hacıbəylinin "Firuzə" operasından "Firuzənin ariyası", Fikrət Əmirovun "Mən səni araram", "Göygöl" mahnıları, Arif Məlikovun "Məhəbbət əfsanəsi" baletindən bir sıra fraqmentlər səslənərək, dinləyicilərin yaddaşına əbədi həkk olunub.

1990-cı ildə Kamil Cəlilovun ifa etdiyi "Zəminxarə" muğamı Qara Yanvar hadisələri zamanı xalqın kədərinin və faciənin dərinliyinin musiqi dili ilə ifadəsi idi.

1985-ci ildə Dağıstan Bəstəkarlar İttifaqının plenumunda bəstəkar Maqomed Hüseynov Kamil Cəlilova həsr etdiyi "Qoboy və simfonik orkestr üçün konserti"ni səsləndirib. Ümumittifaq radiosunda Kamil Cəlilovun 45 dəqiqəlik çıxışı lentə yazılıb. Lent yazısına "Arşın mal alan", "Çahargah ahəngi", "Şirvan şikəstəsi", "Sarı gəlin", "Məhəbbət təranəsi", "Əfqan melodiyaları" və başqa musiqi parçaları daxil edilib.

1997-ci ildə "Azərbaycantelefilm” tərəfindən Kamil Cəlilov haqqında sənədli televiziya filmi çəkilib.

2017-ci ildə Səadət Təhmirazqızı Kamil Cəlilovun həyatından bəhs edən "Kamilin sənət dünyası" kitabını nəşr edib.

2018-ci ildə ustad sənətkarın 80 illik yubileyi münasibətilə Beynəlxalq Muğam Mərkəzində yubiley gecəsi keçirilib.

Allah rəhmət eləsin.