Azərbaycan Respublikasının müstəqilliyinin bərpasının 34-cü ildönümü münasibətilə Vaşinqtonda yerləşən Amerika Universitetinin Katzen İncəsənət Mərkəzində kəlağayı sənətinə həsr olunmuş tədbir baş tutub.

AZƏRTAC-ın məlumatına görə, tədbir Azərbaycan Respublikasının Amerika Birləşmiş Ştatlarındakı Səfirliyi, Mədəniyyət Nazirliyi və Azərbaycan Milli Xalça Muzeyinin birgə təşkilatçılığı ilə həyata keçirilib.

Tədbir çərçivəsində Azərbaycan Milli Xalça Muzeyinin kolleksiyasından seçilmiş 10 tarixi və müasir kəlağayı, onların hazırlanmasında istifadə olunan ənənəvi naxışlı çap lövhələri, xam ipək materiallar və saplar sərgilənib.

Proqram çərçivəsində kəlağayı sənətinə dair hazırlanmış xüsusi videoçarx nümayiş olunub, bu mövzuya həsr edilmiş nəşrin təqdimatı keçirilib.

Tədbirin rəsmi hissəsində Azərbaycanın ABŞ-də səfiri Xəzər İbrahim çıxış edərək təxminən 30 il bundan əvvəl müstəqilliyimizi bərpa etdikdə Azərbaycan haqqında çox adamın məlumatlı olmadığını deyib və bu gün ölkəmizin bir sıra qlobal proseslərin mərkəzində olduğunu qeyd edib. Səfir həm müstəqilliyin, həm də kəlağayının, həm də malik olduğumuz bütün sərvətlərin bir-birinə bağlı olduğunu vurğulayıb.

Azərbaycan Milli Xalça Muzeyinin direktoru Əminə Məlikova 2014-cü ildə kəlağayı sənətinin YUNESKO-nun Qeyri-maddi Mədəni İrsi siyahısına daxil edildiyini bildirib. Onun sözlərinə görə, kəlağayı yalnız xanımların qarderobunda olan gözəl bir əşya və ya yalnız bir tətbiqi sənət nümunəsi deyil, xalqımıza məxsus dərin fəlsəfədir. Kəlağayı nəsildən nəslə ötürülən yaddaş qoruyucusudur. Əminə Məlikova ilk dəfə olaraq Azərbaycan Milli Xalça Muzeyinin kolleksiyasının Vaşinqtonda nümayiş olunduğunu deyərək, 18-ci əsrin sonu, 19-cu və 20-ci əsrin əvvəlinə aid olan çox nadir ənənəvi kəlağayıların sərgiləndiyini vurğulayıb.

Amerikalı alim Pol Teylor kəlağayının Azərbaycan və onun milli kimliyi üçün böyük əhəmiyyət daşıdığını deyib. Onun sözlərinə görə, 1991-ci ildən sonra isə bu, Azərbaycan üçün daha da vacib olub. O qeyd edib ki, kəlağayın simvolları və ya motivləri müasir sənət əsərlərində müxtəlif yollarla araşdırılır. Lakin alim ingilisdilli dünyada bu barədə çox bilinmədiyini vurğulayıb və buna görə də “Hali” jurnalında kəlağayı haqqında məqalə yazdığını əlavə edib. Onun sözlərinə görə, daha çox insan bu barədə məlumatlı olmalıdır.

Tədbirin bədii hissəsində isə Azərbaycanın əməkdar artisti, pianoçu Nərgiz Əliyarovanın solo musiqi proqramı təqdim olunub. Konsertdə Üzeyir Hacıbəylinin “Cəngi” əsəri, Lala Cəfərovanın Üzeyir Hacıbəylinin “O olmasın, bu olsun” musiqili komediyasının mövzuları əsasında bəstələdiyi “Fantaziya”, Qara Qarayevin “Yeddi gözəl” baletindən “Gözəllər gözəli” və “Ayişənin rəqsi”, “İldırımlı yollarla” baletindən “Ehtiraslı qızın rəqsi”, Faiq Sücəddinovun “Vətən balladası”, həmçinin Azərbaycanın sevilən xalq mahnısı “Sarı gəlin” səsləndirilib.

Məlahət Nəcəfova

AZƏRTAC-ın xüsusi müxbiri

Vaşinqton