Əslən Cənubi Azərbaycandan olan Hüseynağa Ələsgər oğlu Sadıqov 21 mart 1914-cü ildə Bakıda doğulub. Gənc Tamaşaçılar Teatrı yaranandan bir il sonra, 1930-cu ildə müsabiqə ilə kollektivin aktyor truppasına sınaq müddətinə qəbul olunub. 1931-ci il iyunun 1-də teatr truppasına aktyor götürülüb. İlk vaxtlardan ona məsul rollar tapşırılıb.

Görkəmli aktyor bir çox əsas rolların ifaçısı olub: Pitli ("Əfilər", Rabindranat Taqor), Xasay, Eloğlu, Məlik ibn Səid ("Xasay", "Eloğlu" və "Bir saat xəlifəlik", Abdulla Şaiq), Bobçinski, Jevakin ("Müfəttiş" və "Evlənmə", Nikolay Qoqol), Seryoja Streltsov ("Seryoja Streltsov", Valentina Lyubimova), Azad ("Azad", Əyyub Abbasov), Mirzə Qoşunəli ("Bəxtsiz cavan", Əbdürrəhim bəy Haqverdiyev), Həsən ("Yaşar", Cəfər Cabbarlı), Trufadino ("İki ağanın bir nökəri", Karlo Haldoni), Rəcəb ("Şirinbala bal yığır", Salam Qədirzadə), Səlim ("Anacan", Yusif Əzimzadə), Spid ("İki veronalı", Uilyam Şekspir), Qey ("Qar Kraliçası", Yevgeni Şvarts), Hacı Murad ("Tamahkar", Süleyman Sani Axundov), Ceyms Berten ("Ovod", Etil Voyniç), Jiront ("Skapenin kələkləri", Jan Batist Molyer), Məşədi Cabbar, Tarverdi ("Molla İbrahimxəlil kimyagər" və "Xırs quldurbasan", Mirzə Fətəli Axundzadə), Cəbi, Əhməd ("Hacı Qəmbər" və "Ağa Kərim xan Ərdəbili", Nəcəf bəy Vəzirov), kapitan ("Qavroş", Viktor Hüqonun "Səfillər" romanı üzrə səhnələşdirənləri Zəfər Nemətov və Əli İsmayılov), Mirpaşa ("Komsomol poeması", İsgəndər Coşqun), Şah Ələmgir ("Əlvida, Hindistan!", Qeybulla Rəsulov), aptekçi ("Romeo və Cülyetta", Uilyam Şekspir), Şamdan bəy ("Şamdan bəy", Nəriman Nərimanov), Abbas ("Mənim nəğməkar bibim", Əkrəm Əylisli).

O, teatrda işləməklə yanaşı, kinoya da çəkilib. Aktyorun kino fəaliyyəti onun yaradıcılığının bütöv bir qolunu təşkil edir. Biz ilk dəfə onu rejissor H.Seyidbəylinin 1962-ci ildə çəkdiyi “Telefonçu qız” filmində kiçik bir epizodda – təhlükəsizlik mühəndisi rolunda gördük. Onun ikinci rolu rejissor Ə.Atakişiyevin 1964-cü ildə yaratdığı “Sehirli xalat” fantastik macəra filmində olub. O, bu filmdə yaltaq vəzir rolunda çəkilib.

Bundan sonra Hüseynağa Sadıqov “Yenilməz batalyon” tarixi-inqilabi filmində özünün xasiyyətinə, rəftarına, təbiətinə xas olmayan bir obraz yaradıb. Görünür rejissor H.Seyidzadə bu həlim və mülayim xasiyyətli aktyorun nələrə qadir olduğunu hiss edib. Bu filmdə H.Sadıqov çar ordusunun əsgəri-feldfebel rolunda çəkilib.

Ötən əsrin 70-ci illərdə H.Sadıqovun kino yaradıcılığı daha məhsuldar olub. O, 1970-ci ildə rejissor H.Seyidbəylinin “O qızı tapın” detektiv filmində dalandar, rejissor T.Tağızadənin “Yeddi oğul istərəm” tarixi-inqilabi filmdə Novruz bayramında camaatı şənliyə çağıran Kosa, 1975-ci ildə rejissor Ş.Mahmudbəyovun lentə aldığı “Dörd bazar günü” televiziya filmində Əsəd dayı, rejissor A.Babayevin “Alma almaya bənzər” kinokomediyasında Nadir baba, rejissor R.Ocaqovun 1977-ci ildə yaratdığı “Ad günü” televiziya filmində Əlinin atası, rejissor C.Fərəcovun 1978-ci ildə istehsal etdiyi “Arvadım mənim, uşaqlarım mənim” novellasında kənd sovetinin sədri rollarında çıxış edib, bəziləri epizodik olsa da bir-birindən maraqlı surətlər yaradıb.

1981-ci ildə çəkilmiş “Babamızın babasının babası” kinokomediyası insan taleyi barəsindədir. Rejissor T.Tağızadə bu filmi çəkərkən baş rola – Əziz baba roluna tərəddüd etmədən Hüseynağa Sadıqovu dəvət edib.

Hüseynağa Sadıqov kinoda ikinci dəfə vəzir rolunda, özü də bu dəfə baş vəzir obrazında M.Qorki adına kinostudiyada 1966-cı ildə rejissor Boris Rıtsarevin çəkdiyi “Ələddinin sehrli çırağı” film-nağılında oynayıb. Bu rol onu bütün Sovetlər İttifaqında məşhurlaşdırıb.

Aktyor H.Sadıqov teatrda işləməklə, kinoya çəkilməklə yanaşı radioda və televiziyada da maraqlı tamaşalarda çıxış edib. Tamaşaçıların yaşlı və orta nəsli məşhur “Piri babanın nağılları” televiziya verilişini yəqin ki, yaxşı xatırlayırlar. Bəs Xoruzbabanı necə? Bilirsinizmi, çoxları ona o vaxtlar “Xoruzbaba” deyə müraciət edib. H.Sadıqov bu sözə elə alışıb ki, heç kimdən incimirdi.

"Komsomol poeması" tamaşasında oynadığı Mirpaşa roluna görə 1967-ci ildə Respublika Lenin komsomolu mükafatına layiq görülüb.

Göstərdiyi səhnə xidmətlərinə görə 1 iyul 1956-cı ildə “Azərbaycan SSR-ninƏməkdar artisti”, 9 fevral 1979-cu ildə “Xalq artisti” fəxri adları ilə təltif olunub.

Hüseynağa Sadıqov 23 fevral 1983-cü ildə Bakıda vəfat edib.

Qeyd edək ki, 2019-cu ilin martında Azərbaycan Dövlət Akademik Musiqili Teatrında Hüseynağa Sadıqovun 105 illik yubileyi qeyd olunub.