1971-ci il mayın 11-də dünyanın 23 ölkəsinin 2200 elm və mədəniyyət xadimlərinin imzası ilə BMT-nin Baş katibinə ətraf mühitin çirklənməsi ilə bağlı müraciət ünvanlanıb. Onlar “Ya biz çirklənməyə son qoyaq, ya da çirklənmə bizə son qoyacaq” adlı müraciətləri ilə bəşəriyyətə ətraf mühitin çirklənməsi barədə xəbərdarlıq ediblər.

1972-ci il dekabrın 16-da İsveçrənin Stokholm şəhərində keçirilən Birləşmiş Millətlər Təşkilatı Baş Assambleyasının 27-ci sessiyasında 5 iyun tarixinin Beynəlxalq Ətraf Mühitin Mühafizəsi Günü kimi qeyd olunması elan edilib. Həmçinin Baş Assambleyanın bu sessiyasında BMT sistemində BMT Ətraf Mühit Proqramı (UNEP) yaradılıb. Hər il bu təşkilat tərəfindən Beynəlxalq Ətraf Mühitin Mühafizəsi Günü keçirilir.

Baş Assambleya bu günün qeyd edilməsi ilə bağlı qətnaməsində BMT-yə daxil olan ölkə və təşkilatları hər il həmin gün ərəfəsində ətraf mühitin qorunması və yaxşılaşdırılmasına yönələn işlər həyata keçirməyə çağırır. Hər il Birləşmiş Millətlər Təşkilatının Ətraf Mühit Proqramı (UNEP) Ümumdünya Ətraf Mühit Gününün Avropa regionunda qeyd edilməsi üçün Qitə ölkələrindən baş şəhərlər elan edir.

 2010-cu ildə İtaliyanın Genuya, İsveçrənin Cenevrə şəhərləri ilə bərabər, Azərbaycanın Bakı şəhəri də mərkəz şəhər seçilib.Bakının bu statusa layiq görülməsi Azərbaycanda ətraf mühitin mühafizəsi, ekologiya sahəsində görülən işlərin, həyata keçirilən dövlət və milli proqramların uğurlu nəticəsi kimi qiymətləndirilib və Beynəlxalq qurumların Cənubi Qafqaz regionunda Azərbaycana böyük əhəmiyyət verməsindən irəli gəlib.

5 İyun - Ümumdünya Ətraf Mühitin Mühafizəsi Günü hər il ölkəmizdə də qeyd olunur. Prezident İlham Əliyevin 2010-cu ili ölkədə “Ekologiya ili” elan etməsi bu sahəyə diqqəti daha da artırıb.“Ekologiya ili” çərçivəsində, eləcə də sonrakı illərdə ölkəmizdə milyonlarla ağac əkilməsi, yeni parkların salınması və dövlətimizin başçısının özünün bu kampaniyalarda iştirakı ətraf mühitin qorunmasına xüsusi diqqətin göstəricisidir.

Heydər Əliyev Fondunun ekologiyanın, ətraf mühitin qorunmasına xidmət edən “Hərəmiz bir ağac əkək” layihəsi də bu sahəyə böyük töhfələr verib. Fondun prezidenti, UNESCO-nun və İSESCO-nun xoşməramlı səfiri Mehriban xanım Əliyevanın təşəbbüsü ilə həyata keçirilən bu layihə çərçivəsində ölkəmizdə hektarlarla sahə yaşıllaşdırılıb. Ölkədə bu məsələ ilə bağlı Ekologiya və Təbii Sərvətlər Nazirliyinin keçirdiyi monitorinqlər öz müsbət nəticəsini verməkdədir.