Milli mətbəximiz ləziz və faydalı yeməklərlə zəngindir. Onlardan biri də haqqında danışdığımız, daha çox soyuq havalarda immuniteti qaldırmaq, qanazlığında orqanizmin dəmir bazasını möhkəmləndirmək və dözümlülüyünü artıqmaq, turşaşirin məcazı ilə xolesterini sabitləşdirmək və ədvəcatı ilə maddələr mübadiləsini gücləndirmək xüsusiyyətinə malik Fisincan plovdur.

Axı bir yeməkdə bu qədər fayda necə birləşə bilər? Onu tərkibini təşkil edən ərzaqlar, hazırlanan zaman yaranan ovqat və yeyiləndən sonra duyulan xoş əhval-ruhiyyə sübut edir.

Xatırladaq ki, Fisincan daha çox Bakıda və Xəzəryanı bölgələrimizdə hazırlandığından ona əlavə olunan ərzaqlar da yerli xüsusiyyətlərə görə dəyişir. Fisincanı vəhşi ördək, qaz, toyuq, çöl quşları, hətta balıq başı ilə də hazırlayırlar.

Biz sizə qoyun əti ilə rizələrlə hazırlanan klassik Bakı fisincanını təqdim edirik:

Ərzaq normaları.

Qoyun əti – 500 qr

Qoz ləpəsi – 400-450 qr

Baş soğan – 250 qr

Abqora – 40 qr

Ərinmiş kərə yağı

Döyülmüş darçın – 0,2 qr

Duz – 4 qr

İstiot

2 ədəd orta ölçülü nar dənələri

Uzun düyü – 500 qr

Zəfəran – 0,05 qr

Döyülmüş qoyun ətinindən 2 – 3 sm diametrində xırda küftələr düzəldilir. Qoz ləpəsini tavada yağsız qovurub, dəsmal arasında sürtüb qabığını çıxarırlar, sonra həvəngdə əzirlər. Döyülmüş qozu soyuq çuqun tavaya töküb üstünə qaynar abqora və ya limon turşusunun qaynar məhlulunu (2-2,5 ctəkan suya 1-1,5 çay qaşığı limon turşusu) tökürlər. Bu zaman qozun rəngi qaralır. Qoyun ətindən düzəldilmiş küftələriət suyunda pörtürlər, üstünə qızardılmış soğan tökürlər və 20 – 30 dəqiqə bişirirlər. Sonra ona turşu ilə qaraldılmış qozu əlavə edib qarışdırırlar və yumuşalıncaya qədər bişirirlər. Ət bişib suyunu çəkdikdə yağın yarısını da töküb 3 – 4 dəqiqə qovururlar. Yağ üzə çıxmalıdır.

Diqqət yetirmək lazımdır ki, qazanın dibi yanmasın.

Ayrıca qabda zəfəranlı çilov hazırlayırlar.

Qeyd: Fisincanı ikinci xörək kimi isti və soyuq halda yemək olar. Hazır fisincan müvafiq şəraitdə və sərin yerdə, xarab olmadan bir neçə gün qala bilər.

Çox vaxt fisincanın rəngi yaxşı qaralsın deyə qozun üstünə abqora tökdükdən sonra, içinə bir neçə dəfə əvvəlcədən yaxşı qızdırılmış təmiz şiş batırırlar.

Nuş olsun!